شو ذنبي اني كيوت بقلم نور الشام

شو ذنبي اني كيوت بقلم نور الشام

#قصة_شو_ذنبي_اني_كيوت_والك
#بقلم نور الشام

شو ذنبي اني مهضومة وكيوت والكل بحبني وبموت فيني
شو ذنبي اني مهضومة وكيوت والكل بحبني وبموت فيني

ومن الشباك لرميلك حالي
لك اختي ارمي حالك مشان ربك والله راسي بوجعني ومو حسنان اسمع صوت الكنار هاد يخرب بيتك لك والله لو بقرة عم تولد مو هيك لوكلب مقطوعة رجلو وعم يئن من الوجع مابتوصل لهالدرجة
رنيم: العما بعيونكون كلكون غيرانين مني هاي مواهب هي شو بفهمكون
مراد: لك مين مواهب بنت ابو صبحي السمان ههههههه
رنيم ‘: العما مااغلظك
بعد ماراح مراد
رنيم : رح غني شي تاني سألوني الناس عنننك ياحبيييبيي
لك يسألو الحكيم عن علتك ومايلائولك دوا يابعيدة اسكتي فضحتينا بين البشر
رنيم : لك امي حرام غني وطلع مواهبي
امي: لك يطلع بلعك من حلئك منيح كملي جلي من تم ساكت
فات ابي وانا عم حرك ايدي واعمل اشارات ومنسجم
ابي: لك شبك يابي ليش هيك عم تعملي
رنيم: كنت غني يابي
ابو رنيم: لك يابي هيك الي بغني الله يصلحك غني بصوت يابي
رنيم : غني وعلى مسؤوليتك
ابي: غني غني سمعينا
رنيم: عينيك كدابييييين
ابي : بااااااااااس لك يابي من شو بيشكي الأخرس إنخرسي عينيك كدابيين لك ياريت كزبت عيوني ولا سمعت هالصوت
راح ابي وتركني مخنوئة حملت السكين وطلعت بعد ماطلعو اهلي من البيت وقررت انتحر بدي حط السكين بنص بطني بس مسكين بطني لازم خليه يشبع بالأول فتت أكلت وماخليت شي لدرجة حسيت انو بطني وصل لركبي من كتر الاكل وحملت السكين وبدي أنتحر مابسمع غير جرس الباب
رنيم: اف هلأ وئتك
فتحت الباب وكان واقف صبي الكوا جايب طقم اخي وأنا حاطة السكين على بطني
صبي الكوا: لك اختي شوفي
رنيم : بدي انتحر خلص تعبت من هالحياة
صبي الكوا: طولي بالك هالحياة مو مستاهلة تخسري دينك
وهوا بيحكيلي بتيجي امي
امي: لك شوفي
الصبي: ياخالة بدا تنتحر وتحط السكين ببطنا
امي: لك الله يغضب عليكي مابتعرفي اني بخاف من الدم لك يامغضوبة بدك تنتحري روحي شربي حبوب دوا اسهل واريح
بييجي ابي
ابي: لك شوفي
امي: بنتك بدا تنتحر وتحط السكين ببطنا انا حكيتلها تشرب دوا اريح
ابي: لك شو تشرب دوا انتي التانية تفتح اسطوانة الغاز اسهل هلأ انا فاضي اسمع صوتا وهيا تصرخ وتتوجع من بطنا ومغص
سمعتون ستي واجت
ستي : شوفي ياولاد
ابي : بدا تنتحر كنت احكيلا تفتح اسطوانة الغاز وتنتظر
ستي: لك ليش ياستي تموتي كافرة وتتعزبي عالفاضي
رنيم:للحظة حسيت حدا بحبني وحس فيني وخايف علي وفرحت
ستي: ارمي حالك تحت عجل سيارة ميتة وميتة ياستي خلينا ناخد دية من شي حدا ونفك ضيقتنا انتي بترتاحي ونحنا منرتاح
تركت السكين وفتت على غرفتي هلأ كل الناس بتكرهني قررت انبسط ومارد على حدا
لحتى سمعت صوت الي عم يناديني
ابي:تعي شوفي خطيبك راح ابي وتركنا لحالنا خطيبي بصير ابن عمي
ئعدت حد خطيبي بعد شوي رحت ورجعت
خطيبي : شو حبيبتي ليش زعلانة
رنيم: حبك برص لك مين انت ماحدا حاطلك قيمة واحد مابتسوى فرنك مصدي
خطيبي: لك شبك شو عاملك انا
رنيم : كيف قبلت فيك مابعرف بس الله يجازي الي كان السبب
خطيبي : لك ليش انتي مابتحبيني
رنيم: انا حبك لك انا بكرهك لك والله بحب الصرصور الي كل البنات بتخاف منو اكتر منك
خطيبي: خلص اسكتي مسك حالو وطلع
رنيم: إلهي درب إلي يسد مايرد ماسمعت غير هداك الصوت
آاااااااااااااااااااخ
طلعت بسرعة شفت خطيبي راسو بالأرض ورجليه فوق
رنيم: دخيلك ياربي مابعرف انو دعائي مستجاب
امي كانت بالمطبخ وسمعت هالحكي وجن جنانا
الكل صار يحسبلي الف حساب امي حكت لابي وابي ماصدق هالحكي حكى صدفة بس بعد ماتكرر هالموقف واخي دايئني ودعيت عليه انو يطلع ويرجع ماكل قتلة وطلع اخي ورجع راسو كلو دم
هون اعلنو النفير العام ………….
الكل صار يخاف مني ويجيبولي كل إلي بتمناه
ليوم ستي دايقتني بالحكي وحكيت عليها توقع وتنكسر ومافي غير ستي طلعت من هون وسيارة الاسعاف كانت بالحارة من هون وقعت ستي عن الدرج وانكسرت
وسمعت الناس بقصتي والكل صار يجي لعندي إلي بدو ولد وإلي بدو يتجوز وإلي وإلي
وبيوم غلطت ئدام بنت عمي لمئوصة مابتنبل بتما فولة وراحت حكت كل شي لاهلي
ومابشوف غير ابي متل الاسد بدو ينقض على فريستو فاتح باب غرفتي وفات بسرعة عيونو حمر والدخان عم يطلع من راسو وحرارة نفسو واصل لعندي حسيت حالي فروجة مشوية عم بتحمص على مهلي مسكني من شعري واخي من ايد وامي من ايد وستي من رجل وعمي من رجل استكترو علي فتحو جبهة حرب
من كتر الشد حسيت رقبتي صارت متل رقبة الزرافة ورجلي متل رجلين النعامة اجا خطيبي من برا انا شفتو وشفت الفرج صرخت احمد مشان الله انقذني حسيتو الفارس المغوار
احمد: عمي ازا سمحت خليني اسمع منا يئبرني شو رجال وقد كلمته
كلون بعدو عني وحكالي احكي كل القصة مشان ساعدك
مرام : هاد لما نزلت منا عنا ووقعت عن الدرج انا بعد مافتت عنا رحت دهنت الدرج زيت وانت طلعت وتفركشت ووقعت
احمد: واخوكي
رنيم: والله ماعملت شي غير وقفت عالبلكونة وحكيت لابن الجيران انه اخي بخرب بينه وبين حبيبته وصرت احكيله هي رح تصير مرت اخي ومدلو لساني وهوا شاف اخي وهجم عليه مابيلقى مزح
احمد : طيب وستي
رنيم: رنيم ماعملت شي بس دهنت الدرج بصابون جلي
احمد: مراد روح ادهنلي الدرج زيت وصابون جلي
وانا ئلو حبيبي شو بدك تعمل الله يخليك ماعملت شي
احمد: بسرعة مراد وماحسيت غير حملوني وانا فكرتون بمزحو وصرت اتخيل عم يلعبو معي بعدين ماحسيت غير على جسمي إلي صار يرقص رقص على الدرج وهون عتمت الدنيا ماصحيت غير على هالوش الملائكي الي متل فلقة القمر عم يسألني هدول كم اصبع وانا من كتر مو ماخد عقلي جمالو ماعدت ركزت انو هنن٣ وانا احكي ١٠ يحكيلي ياأختي ركزي وانا ئلو١٠ يحكيلي شو الرقم بعد ٢ بدو ينقذ مهنته يحكيلي ت وانا ئلو تمانية كأني كيوت بدو يغششني يئبرني
طلع وهو ينتف بشعرو لك انا كسلانة بالمدرسة ومابعرف الجمع من الطرح ومابعرف ركز هلأ بدك ياني ركز مع هالجمال رووووح الله يحميك لأهلك
امي وابي: الله يغضب عليكي فضحتينا
المهم انا هلأ واقفة قدام الشباك قصدي مشلولة وايدي مكسورة وعم اتأمل هالقمر إلي بيشبه الدكتور الي ماراح من بالي وصرت حب الرياضيات مشانو عم بشركون صرت اعرف عد للعشرة قبل ماعمل اي شي…

طلعت من المستشفى وبلشت اتعافى وهلأ رح يبلش العقاب فكرت انو اهلي نسيو بس كنت غلطانة
امي : ئومي ولي مئوصة رتبي البيت جايينا ضيوف جيرانا لجدد
رنيم:حاضر امي
طلعت من الغرفة وبلشت شطف وتكنيس ومسح غبرة وماخليت شي والبيت كأنو الك عمر مو منظفيتو والاميرة امي عم تجهز حالا حسيت كأني السيرلنكية تبع البيت حالتي كانت مزرية كتير شعري منكوش ورجلي رافع عن وحدة والتانية نازلة ووضعي مابسر العدا
رن الجرس
رحت افتح فتحت الباب وشفت الجارة وبس شافتني انصدمت من شكلي كأنك حطيتي عليها سطل مي بارد
المشكلة مو هون المشكلة انو فكرتني الخدامة
الجارة :وين ماما
رنيم :ماما صغير ولا ماما كبير
الجارة بعد ماصدقت اني الخدامة
ليش في ماما صغير وماما كبير
رنيم؛بابا كبير متزوج ٢ ماما
الجارة : ناديلي حيلا حدا
رنيم :حاضر
رحت ناديت امي وفتت على غرفتي وانا اضحك بعد ماحضرت لضيافة
ام رنيم :اهلاوسهلا بجارتنا
الجارة:اهلين فيكي حبيبتي منيح عندكون خدامة والله بريحو بهالايام
ام رنيم :اه خدامة
الجارة:لك اي الخدامة الي فتحتلي
ام رنيم:اه اي ونفشت ريشا لك يااختي الواحد بدو يرتاح
الجارة: والله معك حق بس وين ضرتك مو شايفا
ام رنيم :ضرتي مين
الجارة : مارضيت تحكي انو سمعت من الخدامة اي سمعت انو جوزك متجوز عليكي بس يااختي هالرجال مالون امان ناكرين الجميل يعني حدا عندو هالجمال وبتجوز
ام رنيم:والشيااطين بتتنطط قدام وشا والله ازا كان هالحكي صحيح اني لموتو بإيدي طلعت الجارة من عنا وامي رح تجن ناطرة ابي على اعصابا بعد مارنت على تلفونو ١٠مرات ومارد
رنيم : شبك امي
ام رنيم:انئلعي من وشي الله ياخدك فتت على غرفتي بعد ماسمعت صوت ابي اجا تحسباً من شي رصاصة او شي طاير بألهوا بعد التكسير الي رح يصير وفتت عالخندق تبعي وانا حاطة على راسي طنجرة وماشكة الئشاطة الي بشوفني بفكرني الساحرة الشريرة
بعد ماتخانئو ابي وامي والناس اجتمعت على صواتون ابي طلب من امي تروح عالجارة وتتأكد من مين سمعت راحت امي ورجعت والشرار بطلع من عيونا ومن كتر الركض هيا وابي من العصبية حسيت كأنو تدريب عسكري وسمعت هداك الصوت رنيييييييييم نطقت الشهادتين وعرفت انو نهايتي قربت…

بعد ما فات ابي وامي لعندي عالغرفة مسكني ابي وانا عم فوت ازحف لتحت التخت وكأني بساحة معركةطالعني ومسكني من شعري وصار يلفني لف حسيت حالي عم برقص خليجي بعدين علقني من رجلي وبلش فيني ضرب وين الجنب الي بوجعك تنهنهت ياربي والله كان مزح بعد ماخلص ابي سلخ ودبح الخاروف الي هو انا نزلت لعند ستي وبس شافتني فوتتني عالبيت بعدما زعلت علي فوتتني على غرفتا لحتى نام وطلعت فتحت خزانة ستي الاثرية من باب الفضول وشفت هديك الشوفة ………
علبة حلو من النوع الفاخر طالعتا وكنت بدي بس دوق وحدة ماحسيت على حالي الا اكلتا كلها من كتر موطيبة وبعد شوي مابسمع غير ستي عم بتنادي يارنيم طالعيلي علبة الحلو بدي آخدا لناس بمناسبة زواج ابنن انا سمعت هيك وصابني تلبك معوي ياربي شو بدي اعمل لك شو عملت انا هون ماكان في قدامي الا انزل تحت على السوبرماركت الي حدنا وجيب حلو من الرخيص وحطو بورق الحلو الغالي واخدت ستي العلبة وراحت على زيارتا مع ابي ليوصلها نزلت ستي عالسوبرماركة بشوفا صاحب المحل وبحكيلها انو بنت ابنك اخدت حلو ومادفعتلي دفعت ستي للرجال وراحت على لزيارة ورافعة راسا بعلبة هالحلو
ستي:كيفك ياام ابراهيم مبروك الكنة لجديدة
ام ابراهيم : الحمد لله الله يبارك فيكي يارب
يارنا جيبي من علبة الحلو الي جابتا ام رمزي
ستي:والله ياام ابراهيم من كتر مو غالية على قلبي جبتلك اغلا شي بالسوق
ام ابراهيم : الله يخليكي ليش معزبة حالك
رنا : تفضلي خالتي
بعدما اكلو من الحلو والكل صفن وصار وش ستي الوان قوس قزح
ام ابراهيم: والله ياام رمزي نغشيتي بها العلبة يعني عند ابو صبحي السمان نفس الحلو بس رخيص
ستي : الله لايئشعو خير الي باعني ياها بس ستي تزكرت حكي السمان اني شتريت من عندو حلو اعتزرت ستي من الجماعة ورجعت عالبيت حتى ماانتظرت ابي يرجعا بالسيارة ماشاء الله ستي الي مابتقدر تمشي صارت تركض وصلت ستي وفاتت عالبيت
ستي : ولي رنيم ياكلبة شو عاملة انا شفت ستي فايتة بعصاية الئشاطة وانا طلعت وصرت اركض بالشارع وستي وراي وكل واحد بالشارع يسأل شو في ويركض معنا الناس فكرت شي زلزال اوفي شي هيك لحتى ستي تعبت ورجعت عالبيت وانا رجعت بعدا فتت على غرفتي وقلبي عم يرقص من التعب وياحرام ستي تنفخو رجليها
اجتمعت العيلة واتفقو اني لازم اتزوج لتى يرتاحو مني او اعقل شوي انا سمعت هالحكي وجنيت لك انا بكرهو لخطيبي كيف بدي اتزوجو هون حكيت والله لخليكون تندمو
حضرو للعرس وانا كرهانة حالي عملنا العرس ورحت على غرفتي ببيت عمي فتت انا واحمد
احمد: كيفك ياعروس
انا سمعت عروس وجنيت صرت ارقص زومبي هون احمد صار يسمي ويقرأ قرآن عليم الله صار شيخ
وصرت ارجف وانزل بالارض واطلع ……بيت اهلي بينو وبين بيت عمي مشي ربع ساعة من الخوف احمد طلع متل الطيارة طلع مو لابس برجلو شي وصل خلال دقيقة ماشاء الله بيمشي على بنزين
دق الباب
ابي:شوفي ابني
امي: بسم الله شوفي
احمد عمي تعال شوف بنتك
ابي :شو في شو عملت فيا
احمد :والله ياعمي ماعملت لسا شي بنتك كأنو فيها جني
امي : فضايل قل هو الله احد شو عم تحكي
اجو اهلي وشافوني وانا هون جنيت وصرت متل السحلية اتحرك ونط وطالع صوت حيوانات اهلي جنو وماخلو شيخ يعتب عليهون وماجابو وكل واحد يحكي شي شي مسحورة شي فيا جني شي عين الله وكيلكون صرت حقل تجارب وبيوم وانا بغرفتي عم بتدرب وبضحك اجا احمد وشافني وعرف اني عم اكزب راح لعند اهلي وخبرهون ازا مابعملو متل مابدو رح يطلئني ويفضحني
اجو احمد واهلي لعندي عالغرفة
احمد : لك عمي وين رنيم مو مبينة بسم الله اخدوها
انا هون سمعت هالحكي جنيت صرت صرخ لك ابي انا هون امي احمد شبكون
وهنن عم يبكو ويصرخو وامي دموعا عم ينزلو متل الشلال وانا صرت ازحف عالارض من الخوف مابئا ئدرت امشي هون اهلي خافو علي وصارو يضحكو لك مجنونة هيك تعملي فينا هون انا من الفرحة حضنت ابي وامي وانا ابكي طلعو ابي وامي بعدما وعدتون اني ماعاد عيد هالفصول وراح احمد ياخد دوش وانا مافيني اترك هالعادة خليتو جوا وسكرت المي
هون احمد صرخ رنييييييييييم
انا هلأ جهزت غراضي وشنتايتي ولبست ناطرة لحتى احمد يطلع اكيد رح يطلقني طلع احمد عيونو حمر مسكني من ايدي مرتي الحلوة هلأ رح انتقم منك
رنيم بخوف : شو بدك تعمل
احمد بإبتسامة :رح تصير مرتي حقيقة مو بس عالورق
حملني احمد وانا من الخوف خرست😂

……………
اتفقت مع جوزي احمد روح لعند ستي اتطمن عليها من بعد ماتزوجت مازرتها ولا مرة وكنت مخطط لفكرة شيطانية مو هيا الي اقنعت اهلي يزوجوني والله لانتقم منها
كنا كل جمعة نجتمع عند ستي الي كانت تحكيلنا عن حياتون ايام زمان انا وسارة ونجاح ورزان
رنيم:ستي احكيلنا عن حياتكون كيف كانت الله يخليكي
ستي :طيب يابنات رح احكيلكون كنت انا حلوة كتير بزمناتي كنت أحلا بنات الضيعة كل الشباب كانو يحبوني وجهي متل الملائكة وشعري الحرير لنص ظهري وأنفي لصغير كل شي فيني حلو ومميز
رنيم: بس ياستي كيف شعرك كان حلو وناعم وهلأ عليم الله مابينفع غير لتنظيف لصحون والجلي
ستي:لك ياحيوانة والله حرام احكيلك بس رح فهمك حرام فيكي المدارس مو الانسان بس يكبر بصير فيه تجاعيد بوشو
رنيم :اي ستي شو دخل وشك بشعرك مافهمت
ستي:لك لانك غبية الشعر كمان بينشف وبجعد هيك
رنيم :طيب خلصنا من شعرك وأنفك لصغير هاد الي اكبر من حبة الكوسا شو قصتو
ستي :لك يخرب بيتك من حالك هلأ هيك انفي لك موحكيتلك الانسان بيكبر وبكبر كل شي فيو رنيم :حسيتك ياستي متل ستا لليلى انفي كبير لحتى شم ريحتك
كانو كل البنات عم يضحكو
ستي : مارح كمل لحكاية
رنيم : لك ستي مو هيك بس حسيتك عم توصفي الاميرة سنوايت مو انتي
ستي :انئلعي من وشي مارح كمل
رنيم والبنات :خلص ستي كملي الله يخليكي
ستي: طيب امري لله وكان في واحد بالضيعة بحبني لك شكلو كان متل اسمو فارس
شوي وبفوت جدي على أخر كلمة قصدك فارس الشخاخ الي كل الحارة كانت تشم ريحتو من كتر ماكان يعملها على حالو
هون انا والبنات ماضلنا قلب من كتر ماضحكنا
زعلت ستي ومارضيت تكمل قصة سندريلا وراحت على غرفتها
رنيم : جدي احكيلنا عنك كيف كنت زمان
جدي:والله يابنات كنت زينة شباب الضيعة كل البنات كانت تحبني وتبعتلي مراسيل
رنيم:طيب جدي كيف تزوجت ستي وانت احلا منها وفيك تاخد احلا منها ……وانا بسري عم قول والله والي اسمو الله بعالي سما مابطلع من هون الا وخارب عليكون عيشتكون
جدي :هي اقسام ياجدي والله انا كنت حب وحدة اسما فوزية بس ماصار نصيب وتعرفت على اهل ستك وتزوجتا
رنيم:تركت جدي يخبر البنات بقصصو البطولية مع البنات ورحت عند ستي خبرها
رنيم :ستي
فاطمة :خير ياطير شوفي
رنيم:والله ياستي مابهونلي فيكي انتي زعلانة وجدي برا مبسوط وعم يحكي عن حبيبتو فوزية هون ستي سمعت هالخبر وماضل فيها عقل طلعت تركض متل الصوص الي مضيع امو
جدي:والله يابنات ايام كتير حلوة كانو البنات يتخانئو لحتى احكي معون
فاطمة :حسن مين هاد الامير الي بتحكي عنو عند بالي كنت تلم زبالة الحارة لحتى تبيع الخردة الي فيها
جدي: فاطمة خرسي احسن ماكسر سنانك
رنيم :شو بدو يكسر جدي خالصة مافي سنان
جدي ؛لك فاطمة شوفي مين عم يحكي لك مو انتي حفيتي وراي لحتى حكيت معك
ستي:لك لهون وبس انا كنت احكي معك بس بدي غيظ فوزية واخي شافني عم بحكي معك وزوجنا غصب عني
جدي:لك هيك صار هلأ اي والله يافاطمة لربيكي
تركت ستي وجدي يتخانئو وطلعنا انا والبنات بعد مانشفى غليلي من ستي لكن انا تعمل فيني هيك
رجعت عالبيت قبل احمد مايرجع من الشغل
حماتي:منيح الي شرفتي ست الحسن والدلال
رنيم:شوفي مرة عمي
حماتي :لا ولاشي بس تاركة شغل البيت ورايحة
رنيم :خلص مرة عمي هلأ بفوت كمل شغل
حماتي:اي فوتي تضربي من بين الكناين
رنيم:والله لندمك على حكيك هاد
فتت على المطبخ وفتحت طنجرة الاكل شفت حماتي طابخة رز وفاصوليا وانا بحب هالاكلة حطيت صحن كبير واكلت وبعد ماأكلت حطيت كل علبة الملح عالطبخة 😂😂😂 هلأ منشوف شو رح يصير نظفت المطبخ وفتت عالغرفة شوي وبيجي احمد وعمي بتناديلي مرة عمي يارنيم
رنيم :اي مرة عمي جاي رحت وجهزت السفرة والكل بلش ياكل
احمد ؛كلي رنيم
رنيم:والله مو جوعانة اكلت عند ستي
شوي وعمي بصرخ شوهاد ليش هيك مالح
مرة عمي:والله يارجال ماحطيت غير شوي ملح والله
عمي من كتر العصبية والله عم تكزبيني والله لتاكلي صحن كامل
احمد :خلص يابي
عمي :والله كلمتي مابتصير تنتين
اكلت مرة عمي الصحن وعملت حالا انو عادي منشان مااتشمت فيها بس شكلها كان عم يحكي قصص😂😂 وحلفت يمين الا خليها تدوق من نفس كاسة ستي
كانت الجارات تيجي كل يوم تزورنا ومزح وضحك كنت كل جارة تفوت احكي معها على انفراد وكان الحديث كالتالي :والله انا بحبك ومو حابب هالشي الي عم يصير مرة عمي عم تحكي عليكي انك مو مرتبة ببيتك ومو نظيفة ومابتعرفي تعملي شي انا والله مابحكي هيك لانزع العلاقة بينكون بس منشان تاخدي حذرك منها
وكنت روح اعمل لضيافة وبعد ماروحو كل الجارات رحت لعند مرة عمي
رنيم : شفتي يا مرة عمي ام فؤاد الارملة حاطة عينها على عمي وجاراتنا بدون يساعدوها لحتى تاخدو منك وانا سمعت بالصدفة وحبيت خبرك ونبهك
حماتي:لك رنيم عم تحكي هيك لتنزعي علاقتي معون ولا شو
رنيم:انا حذرتك ورح خليكي تشوفي بعينك
حماتي:اي منشوف وازا هالحكي صحيح والله لاشرب من دمها
رحت على غرفتي وانا عم خطط كيف بدي نفذ الخطة الي براسي تاني يوم بروح لعند جارتنا ام فؤاد وبفوت على اساس اشرب فنجان قهوة
ام فؤاد:اهلين حبيبتي رنيم
رنيم :اهلين خالتي بشرب القهوة وبحلف والله ياخالتي مابتقومي الا انا اخد الفناجين وحطون بالمطبخ وجليت الفناجين ونزعت حنفية المي وصرت صرخ ولي لك ياخالتي ام فؤاد
اجت ام فؤاد :لك شو هاد
رنيم:والله مابعرف كنت غسل الفناجين وهيك صار
ام فؤاد:وشو بدي اعمل هلأ ماعندي حدا متل مابتعرفي
رنيم :خلص خالتي هلأ بتصل على عمي وبخبرو ييجي يصلحها والله واتصلت بعمي واجا وانا مافيني اترك عمي لحالو عندها بعثت مسج لحماتي …..حماتي انا رنيم استني عالشباك وشوفي مين رح يطلع من بيت ام فؤاد بس ديري بالك تحكي لعمي لانو رح يصير ييجي لعند ام فؤاد وماعاد يهتملك انك عرفتي والله وخلص عمي تصليح الحنفية وراح ومابشوف مرة عمي الا بتفوت على بيت ام فؤاد ووجها ازرق وعيونها حمر وبتمسك ام فؤاد من شعرها وانا طلعت نادي للجارات يقومو باللازم فاتو الجارات ومسكو حماتي وبلشو فيها ضرب من كتر مو مليان قلبون عليها من كتر ماعبيت راسون عليها
ورجعت عالبيت مبسوطة كتير اخيرا انتقمت منون كلون والله بيسمع عمي بهالخبرية وبيرجع بخلص حماتي بعد لخناق ولصياح لمقوصة حماتي بتحكي شو صار وانا نبهتها ماتحكي بعد مااكتشفو اني انا السبب بهدلوني وسمعوني كلام بسم البدن ….رحنا اليوم على المول لحتى نجيب شوية غراض ونحنا واقفين عم نستنى لحتى يحاسبو الي قدامنا بتسألني حماتي رنيم جبتي كوسا
رنيم: مرة عمي هي لغراض قدام اتأكدي منها راحت مرة عمي تتأكد وانا عم اضحك بلشت مرة عمي تدور بالكياس وكأنها عم تدور على كنز شوي وبنسحب الكيس من ايدها بقوة مو مرة عمي عم بتدور بغراض الرجال الي قدامنا وعينكون ماتشوفي شو صار رفعت راسها ماشافت غير عيون حمر عم تطلع فيها وهون وقفت دقيقة صمت على ارواح الشهداء الي ضحو بأرواحون فداء للوطن 😂 صارت مرة عمي تعتذر وتحلف انو فكرتون غراضنا بس والله لو تبلع المصحف مارح يصدقا والرجال حكالها مومشكلة بس نظرتو بتحكي قصة كرهت انثى بهدلتني حماتي ورجعنا عالبيت وحكت الي صار لجوزي و قرر زوجي يتزوج علي لحتى يربيني ومارضي يطلقني لاني بنت عمو خايف على سمعة العيلة
انا سمعت هيك وجن جناني والله انا كنت امزح بس هلأ فتح على حالو ابواب جهنم انا مابحبو لحتى ازعل عليه بس مابحب حدا يقرب على شي بخصني والله وراحو خطبولو وجهزو للعرس وكل واحد بشوفني بالبيت بيخاف علي من هالهدوء الي صابني بس مابيعرفو هاد هدوء قبل العاصفة يوم العرس الكل تجهز وراحو على الصالة وانا لبست ورحت على صالون التجميل لازم بارك لضرتي لجديدة واعطيها الهدية رحت وشفتها عم تستنى دورها فتت لجوا وعلى اساس اني المرافقة بس هيا مابتعرف انو انا ضرتها حطيت للكل بالقهوة منوم وضيفتون والكل نام وبلشت بضرتي نتف وتلميع وتزببط عليم الله صارت متل الجاجة المنتوف ريشها لاحواجب ولا شعر لاني قصيتو وخليتها متل الولد وطلعت هلأ بلش الشغل على اصولو بعد ماصحيت ضرتي جن جنانا انو مين عمل فيها هيك طبعا الكل كان نايم ماحدا بيعرف شي بس بتعرفو يعني كيف بيعملو بالصالونات رسمولها حواجب وحطولها وصلات شعر لحتى تكمل هالعرس على خير وانا رحت وحكيت لرجال الحارة انو جوزي كان يحكي مع نسوان الحارة وكان يحكيلي عنكون انكون مو رجال والنسوان ارجل منكون هون اجتمعو كلهون صف واحد لايتفرق هلأ بلشت الحرب وقفنا قدام الصالة وبس طلع جوزي بلش الخطاب الي وجهتو للجيش المقاتل وحياة الشام ورب الشام ماحنسكت طوال مالنفس عم يطلع وينزل يارجال ……الشام طلبت اهلها الشام شامكون لو الزمن ضامكون قولو الله يارجال هون الكل هجم حتى الي بالشارع بعد ماسمع هالخطاب شبت النار بقلبو وفكر الحرب بلشت العروس بس شافت المنظر هربت وصار معها عقدة ضد الزواج ونحنا بنص لخنائة بيجي واحد طنط بيحكيلي شوفي اختي ليش عم يضربو حرام شوفي شو كيوت
رنيم:لك هاد خاين عم يسرب اخبار لبرا البلد
الطنط :لك ليش لك هي ارض تاهرة ارض البتولة ليش هيك يعمل
حسيت بيحكي عن التبولة
راح يشارك بالضرب صار يصرخ بعدو هيك لك تفه عليك تعمل هيك بأرض الشام التاهرة
انا سمعت هيك فار دمي لك والله البنات في بوشون شوارب اكتر منك وصرخت يارجال هاد شريكو بس بدو يشغلكون مشان ماتضربوه هنن سمعو هيك وبلشو في ضرب وانا هون نشفى غليلي طالعت البوشار والعصير لحتى كمل الفلم الاكشن على رواق رجعت عالبيت بعد مااخدو جوزي عالمستشفى وهلأ جوزي على التخت مجبر كل جسمو وهيني عم اخدمو بعيوني بعد ماعمل فيني كل هالشي بس معليش المعاملة مع الله وضبطت المنبه منشان اصحى عالستة الصبح واعطي حماتي الدوا لانها مكسورة من يوم لخنائة شايفين والله انا زوجة صالحة وكنة منيحة بعد كل شي عملوه نسيت كل هالشي وعم اخدمهون
مرت الايام ورجع جوزي احسن من اول وعم يعتذر مني انو كان غلطان لما فكر يتزوج وهو بحبني وهلأ انا حامل وبالشهر الثامن ونايمة عالتخت وكلون نايمين وانا مخنوئة ماعاد فيني اعمل مقالب لك خطرت على بالي فكرة سمعو أااااااااخ لك احمد اصحى ولي بدي خلف
احمد :شوفي شوفي شبك ليش عم تصرخي
رنيم :لك بسرعة بدي خلف اااااااااخ ياربي لك شو هاد بدك تلبس كمان لك بسرعة
احمد:حاضر حاضر
اخدني احمد عالمستشفى وهو لابس اواعي البيت وهناك حكو انو مافي ولادة
احمد:كيف يعني ست رنيم مافي ولادة هالعادة مابدك تبطليها
رنيم:مابعرف كان في وجع وراح
احمد:😡😡😡😡😡
روحت عالبيت ورجعت تاني يوم عملت نفس الفصل بس صرت صرخ اكتر واخدني عالمستشفى وحكولو نفس الشي بس والله اني مبسوطة عم عيش افلام اكشن بالواقع اخ ياربي شوهاد كأني بدي اولد أااااااأخ مشان الله احمد
احمد:شوفي لك والله لو تولدي بالغرفة ماباخدك عالمستشفى لك فضحتينا
رنيم:لك احممممممممد ماعاد فيني بسرعة المهم احمد ماصدق غير لما شاف المي نزلت مني بسرعة حملني وراح عالمستشفى لك شو هاد قلوب الناس سودة حقوديين لك شو عملتلو ليتركني هيك اتوجع المهم خلفت وجبت بنوته كتير حلوة وصار عمرها شهرين وهلأ ماعاد اعمل اي فصول بكفي خلص
حماتي عم تناديلي
حماتي :لك يارنيييم
رنيم :اي مرة عمي
حماتي :الله يرضى عليكي جيبيلي كيس الفواكه الي جبتو لجيرانا الجدد
رنيم:اي مرة عمي تكرمي رحت وجبت الكيس لمرة عمي اخدتو وراحت وانا فتت كمل ترتيب المطبخ
رنيم:ياربي شو هاد ازا هاد كيس الفواكه انا لكن شو اعطيت مرة عمي ولييييي لك اعطيتا كيس البصل ياربي والله لو بحلفلها عالمصحف مارح تصدق انو ماكان قصدي اعمل هيك
شو رأيكون انتو بتصدقني اولا …..
#انتهت ….🌸

mal alsham

اترك تعليقاً

لن يتم نشر عنوان بريدك الإلكتروني.

error: Content is protected !!