عروس للايجار بقلم امل احمد سلوم الجزء الثاني

عروس للايجار بقلم امل احمد سلوم الجزء الثاني

عروس للايجار بقلم امل احمد سلوم الجزء الثاني

عروس للايجار بقلم امل احمد سلوم
عروس للايجار بقلم امل احمد سلوم

 

إنها وَاحدِةٌ من أشدِّ الفتراتِ تَعبًا الفترةُ التي تَكتشِف بها أنكَ وَحيدٌ أكثّر مِن أيّ وقتٍ مََضى و أنك بِكُلِ حُزنِك لا تعني لِـ العالمِ شيئًا

♬♫♪◖(● o ●)◗♪♫♬

خلصت شغلها وغسلت وقعدت ع طرف التخت تتأمل صورة ابوها ودمعتها عخدها
رفاه : ليش تركتني ابي… مابيكفي امي راحت وتركتني وانا صغيره… كيف رح واجه هالحياه بدونك

مسحت دمعتها وهي بتفكر بكلام زكيه… لازم تروح ادور على شغل لتقدر تعيش وتكمل جامعتها… سحبت تليفونها واتصلت لرفيقة عمرها
رفاه : كيفك ملك
ملك : اهلين ياروحي انا منيحه طمنيني عنك
رفاه : اااه ياملك بعد ماراح الغالي كل هالدنيا ماعادت تسوى شي
ملك : الله يرحمه ويغفر له هي سنة الحياة ياقلبي…
رفاه بحزن : امين يارب العالمين
ملك : وشو ناويه تعملي هلأ
رفاه : بدي روح دور على شغل
ملك : رح تتركي الجامعه لك مو باقي الا هالفصل ونتخرج
رفاه : لك شو اترك الجامعه .. انا رح اشتغل وادرس
ملك : ايوا ازا هيك تمام
رفاه : ازا فاضيه تروحي معي نفتل ع شي وظيفه بلكي الله ييسرها
ملك : اي فاضيه .. تعي لعندي لنروح سوا
رفاه : يالله جايه
قامت رفاه لبست قميص اسود وبلطلون اسود وعملت شعرها الاسود جدوله رمتها براحه ع كتفها وكأنها عم تعلن الحداد وطلعت من البيت وكلها امل تلاقي شي وظيفه تسترها من السان زكيه وحتى تقدر تكفي جامعتها وماتحتاج حدا

*╚══════ღღ══════╝

كمال : هيك لكان بدو يستأجر عروس ليقدر يتزوجك ههههههههه
نور : بابا وسام ناوي يخلص الموضوع بشهرين ويجي يطلبني كيف رح تحل هالموضوع انا مستحيل اقبل اتزوجو انا بكرهو وبكره امه وابوه بكرهم كلهم
كمال : بتفكري اني ممكن اقبل تتزوجي من هالحيوان… انتي خليكي عم تمثلي عليه الحب لنوصل للي بدنا ياه
نور : الله يصبرني والله كل مايحكي معي بحس نفسي عم تلعي
عصام : فكري بالثروه اللي رح تنزل علينا وتسير ملكنا وبس لحتى تروح لعية نفسك…. وينك نور الغلط ممنوع بدك تستمري بتمثيل الحب على وسام لحتى نوصل لهدفنا
نور : ماشي بس رح تكون حصتي مضاعفه ماتنسوا تلت ترباع الضغط عليي وحدي وانتو مرتاحين
عصام : ماتكوني طماعه
نور : والله هاد يلي عندي
كمال: خلص ياعصام اترك اختك براحتها… وغمزه
عصام بخبث : ماشي ابي اساسا مافيي زعل اختي حبيبتي

*╚══════ღღ══════╝

رفاه : لك فتلنا نص محلات البلد وبدون فايده
ملك : اي شبك مافي شي بيجي سهوله بدك تتعبي هلأ لترتاحي بعدين
رفاه : الضاهر كل عمري تعب وتعتير ياملك 😔
ملك : يووووه شو مسودنه… وينك ازا بتبقي متشائمة بتركك وبروح افرديها بقى
رفاه : شو تتركيني لك مابقيلي غيرك
ملك : وانا معك يارفيقتي… . الله يسامحه ابوكي لو ماكتب البيت ب اسم زكيه
رفاه : حاسيتها ناطريتني ع نكشه لتقلعني من البيت
ملك : معقول ابوكي ماتركلك شي ولا حتى وصيه صغيره
صفنت رفاه شوي وهي عم تتزكر اخر كلمات ابوها قبل مايموت
( ازا صرلي شي روحي عند وسام بيك هو بيساعدك )
فتحت عيونها على وسعهم وحكت بدهشه : لك اي والله ابي قبل ما يموت حكالي روحي لعند وسام بيك وهو بيساعدك
ملك : ومين هاد وسام بيك ؟؟
رفاه : هاد صاحب الشركه اللي كان بيشتغل فيها بابا الله يرحمه
ملك : وتاركيتنا من الصبح نفتل ع كعوب اجرينا
رفاه : والله نسيت
ملك : بتعرفي عنوان الشركه
رفاه : اي شركة الخطيب للاستيراد والتصدير
ملك : لك هي اكبر شركه بالبلد وعيلة الخطيب نار على علم مشي لنروح بسرعه
رفاه : يالله

*╚══════ღღ══════╝

وبالشركه…
قاعد وسام مع مدير العلاقات العامة يلي هو (ناصر ) وعم يتباحثوا بموضوع العروس اللي رح يستأجروها ويعقدو معها صفقة الزواج
وسام بعصبيه : لك شو صار معك مو ع اساس الموضوع بسيط والف وحده بتوافق لك هاتلي بس وحده من هالالف
ناصر : اي شو صرلك طول بالك هو سلق بيض… مافيي جيب اي وحده افرض طلعت طماعه ولزقت فيك بعد الزواج
وسام : شو يعني خلص مافي امل
ناصر : لك اصبر اخي خليني شوفلك بنت درويشه تكون ظروفها صعبه وتقبل بالقليل
وسام : لا ناصر انا مافيي استغل حاجة الناس لو شو ماصار
ناصر : اي تسطفل

بهالوقت بيدق الباب وبتفوت السيكرتيره داليا
داليا : مستر وسام في بنت برا طالبه تقابل حضرتك وبتحكي انها بنت الفراش عبداللة
ناصر : اصرفيها هلأ مو فاضيين
داليا : امرك مستر ناصر
وسام : استني داليا
داليا : نعم مستر وسام
وسام : خليها نفوت
داليا وهي بتطلع بناصر يلي ماعجبه تصرف وسام : امرك
ناصر : لو تبطل طيبة هالقلب بتعيش ملك
وسام : لك العم عبداللة صرلو اسبوع ماعم يجي عالشغل واخر مره كان كتير مريض وطلب مني شغل بنته اكيد جايه لهاد السبب
ناصر ب استهزاء : قلتلي طلب تشغلو بنتو ايه الله يقويك

*╚══════ღღ══════╝

فاتت رفاه بصحبة ملك لمكتب وسام… وعيونها بالارض

رفاه : السلام عليكم
ناصر وهو عم يطفي سيجارته ويطلع فيها بتمعن : وعليكم السلام
وسام : وعليكم السلام .. تفضلو ارتاحوا
رفاه : لا شكرا مافي داعي انا جايه من طرف عبدالله الحارث يلي كان بيشتغل عند حضرتك فراش
وسام : اهلا وسهلا وينو العم عبدالله
سكتت ونزلت منها دمعه وحكت بصوت مخنوق
رفاه : ابي عطاك عمرو من اسبوع
حس وسام بالشفقه على حال هالبنت .. كانت دمعته صادقه ومن قلب محروق والحزن كاسي ع ملامحها
وسام : الله يرحمه ويغفر له انا اسف ماكنت بعرف لو سمحتي ارتاحي يا انسه
قعدت رفاه وملك وعم السكون للحظه
ناصر : وانتي جايه تشتغلي هون
رفاه : ازا في مجال يا بيك
ناصر : مع مين ساكنه
رفاه : مع مرت ابي واختي
ناصر : والك قرايب
رفاه بعدم فهم : لا بس ليش هالسؤال
ناصر : ابدا مجرد سؤال روتيني… . اي احكيلي مؤهلاتك
رفاه : انا…
قطع حديثهم وسام : مافي داعي لكل هالاسئله ناصر العم عبدالله شرحلي كل شي… وانتي يا انسه… .
وقفت رفاه وحكت بتوتر : اسمي رفاه
وسام : ارتاحي يا انسه رفاه
رفاه : شكرا
وسام : رح عينك بالارشيف حاليا لحتى شوف شغلك
رجعت وقفت وحكت ب امتنان : شكرا يابيك وان شالله بكون عند حسن ظن حضرتك
وسام : ممكن تقعدي
رفاه وهي حاسه حالها غبيه : ااا سسفه
وسام : بالنسبه للراتب رح احسبلك 500 دولار غير الحوافز وانتي وشطارتك
وقفت وحكت متل العسكري : وانا تحت امرك يابيك
ناصر : هههههههههههه
نكشتها ملك لتقعد وحست بالاحراج من تصرفها لكنها تصرفت بعفويه وتلقائيه… كان الراتب كتير منيح ورح تقدر تكفي جامعتها وتصرف عحالها وبيزيد معها
وسام وهو بيحاول يكتم ضحكته لحتى مايجرحها : تمام رح تبلشي دوامك من بكرا وهلأ فيكي تتفضلي لقسم المحاسبه تاخدي راتب العم عبداللة الله يرحمه وبعد اسبوع رح نصرفله مكافأه ورح تستلميها انتي
رفاه : مو عارفه كيف اشكرك شكرا كتير بالازن منك
وسام : نورتي

*╚══════ღღ══════╝

ناصر : كيف شفتها
وسام : مسكينه درويشه وباين عليها طيبه
حط الملف من ايدو وسلط نظرو ع وسام : وهاد المطلوب ياصاحبي بنت درويشه و عباب الله وفوق هيك عايشه مع مرت ابوها
وسام : لشو بدك توصل ناصر
رجع حاله عالكرسي براحه وحط اجر على اجر
ناصر : يعني هي هيه البنت المناسبه
وسام : مناسبه لشو ؟؟
ناصر : هيييي هيدي علينا شبك مخك مسكر .. لك مو قلنا بدنا اندور على بنت درويشه لحتى نعقد معها صفقة الزواج وليكها لحالها اجت على اجريها
وسام : قصدك رفاه ؟
ناصر : ماشالله عرفتها لحالك… اي رفاه كل المواصفات المطلوبه متوفره فيها بنت يتيمه مالها حدا وفقيره
وسام : ولانها يتيمه ومالها حدا نستغلها
ناصر : مين حكا نستغلها بالعكس رح تطلع من هالقصه بمبلغ منيح مايخليها محتاجه حدا… فكر فيها من الناحيه الايجابيه
وسام : لا مو موافق شوفلي وحده تانيه
ناصر : اي تسطفل… انا رايح لمكتبي،

تركه وراح وبقي وسام يفكر بهالملاك الموشح باللون الأسود ونظرة الحزن والانكسار يلي شافهم بعيونها… نفض راسه بقوه ليطرد هالفكرة من تفكيرو وخيالو
وسام : لا مستحيل فكر بهيك شي حرام

*╚══════ღღ══════╝

رفاه : لك انا بحلم ولا بعلم يا ملك ماعم صدق اني اتوظفت بهيك مرتب
ملك الف مبروك يا روحي انتي بتستاهلي كل خير
رفاه : وسام بيك باين عليه كتير جنتل ومنيح شفتي كيف طلب يصرفوا راتب ابي مع انه الشهر ب اولو وابي ما داوم
ملك : في ناس الله عاطيهم وبيحنوا عالغير .. بس وينك ماتجيبي سيره لزكيه عن هالمصاري
رفاه : بس ابي كان زوجها ومن حقها تعرف
ملك : اي من حقها تعرف ومن حقها تاخدهم منك لك تضربي بهالراس اللي ناتعتيه… نسيانه انها مكوشه عالبيت كلو وماعم تعطيكي فلس احمر… بالله كيف رح تروحي وتجي عشغلك وجامعتك لتستلمي اول راتب. اه
حكت راسها بتفكير : اي والله معك حق
ملك : اطلعي اطلعي مو هي اختك لميس يلي بالسياره
رفاه : وينا ؟
ملك : يلي بالسياره الحمرا هونيك
لفت وجهها وانصدمت بس شافت اختها بملابس عاريه وراكبه بحد شب مبين عليه من الطبقه الراقيه وعم يتمازحوا ويضحكوا
رفاه بقلبها : العمااااا لميس شو عم تعمل مع هاد الشب ؟؟
ملك : وين شردتي… روحي جريها مت شعرها
رفاه : لك لا هي مو اختي اكيد انتي مشبهه عليها
ملك بشك : معقول ؟؟؟
رفاه : اايه طبعا… لميس هلأ بكليتها
ملك : اي يمكن مشبهه عليها
رفاه : انا تأخرت عالبيت لازم روح بشوفك حبيبتي
ملك : ماشي انتبهي عحالك
رفاه : وانتي كمان يالله السلام عليكم
ملك وعليكم السلام
وبقلبها : لك بقص ايدي ازا ماكانت اللي بالسياره هي لميس بس ليش رفاه انكرت وغطت عليها ؟؟؟

*╚══════ღღ══════╝

وصلت رفاه عالبيت وهي عم تلهت .. فاتت لغرفة لميس ماكانت موجوده

رفاه : مرت ابي وينك
زكيه : لشو عم تعيطي ولي حكولك عني طرشه
رفاه : وينا لميس
زكيه : هلأ جايه عم تلهتي لتسألي عن لميس… لميس بكليتها
رفاه : لميس موووو بكليتها مرت ابي .. انا شفتها راكبه سياره وعم تتفتل مع شب
احمرت عيون زكيه وقربت من رفاه ودفشتها
زكيه : انتي كيف بتسمحي لحالك تحكي ع بنتي يا شرشوحه هاد فوق ماعم آويكي ببيتي جايه بكل وقاحه تتبلي ع بنتي
رفاه : ورحمة ابي ماعم اتبلى عليها انا بعيوني شفتها راكبه بحد شب باينته غني وعم يتمازحو
زكيه بفرح : قلتيلي غني .. وشو السياره اللي راكبها
رفاه : انتي هاد يلي هامك… مو هامك انه بنتك ممكن اتضيع
زكيه : اخرسي ولي انا بنتي مربايه احسن تربيه احكي انك بتغاري منها لانها احلى منك وارتب منك
رفاه : انتي حره مرت ابي انا خلصت ضميري وخبرتك وانتي تسطفلي تسدقي او لا شي بيخصك… عن ازنك
زكيه : تعي لهون ولي شو صار معك لقيتي وظيفه ولا وجه فقر متل اللي خلفك
رفاه : الحمد لله لقيت شغل
زكيه : وبأي داهيه لقيتي شغل واديش رح يعطوكي معاش حاسب معاش ابوكي يالله يكفينا مصاريف
رفاه : اطمني مارح اطلب منك شي ورح اصرف عحالي
زكيه : ع اساس الفندق يلي تركلك ياه ابوكي مابدو مصروف انطقي ولي اديش حسبولك معاش
رفاه : 500 دولار 💲
زكيه بصدمه : كككم
رفاه : قلتلك 500 دولار يعني رح اصرف عحالي وبعطيكي كمان لاتشغلي بالك
زكيه : انا يا روحي مو قصدي شي بس انتي شايفه الحياه صعبه وكلشي غالي
رفاه : اي شايفه
زكيه : انا بدي نص المعاش
رفاه : نص المعاش ؟؟ وانا مافكرتي فيي وبمصاريف جامعتي
زكيه : فيكي تتركي الجامعه المهم بدي نص المعاش او شوفيلك خرابه تتاوي فيها انا مو فاتحه سبيل
رفاه : حاضر مرت ابي ممكن روح لغرفتي ارتاح
زكيه : اي طبعا ياقلبي ارتاحي لحتى يجهز الاكل وناديلك
رفاه : شكرا… عن ازنك
زكيه : ازنك معك تقبريني ارتاحي منيح تشكلي آسي
وبس صارت لحالها
العما يضربك شو حظك بيفلق الصخر اللهي يلحقك باللي خلفك وارتاح منك…… .
وهي لميس ازا كان هالحكي يلي،سمعته مزبوط رح طين عيشتها ولي على امتي بدها تشرشحني قدام بنت ابتسام وينوووو التليفون وينووووو

*╚══════ღღ══════╝

بغرفه مظلمه مافيها الا ضو خفيف عم ينبعث من التيبل لامب كانت عم تسحب الغطا وتلف جسمها العاري

لميس : حبيبي ايمت رح تعلن زواجنا
ربيع : هانت يا روحي بس لتجي امي من السفر رح اجي واطلبك رسمي… بعدين نحنا متزوجين
لميس : متزوجين عرفي ياربيع انا بدي كون مرتك قدام كل الناس
ضمها لصدرو العاري : وحياتك حتكوني مرتي وحبيبتي قدام كل الناس
لميس : وعد
رفع راسها بطرف ايدو وهمس : وعد ياروحي

بيرن موبايل لميس وبتتناوله
لميس : هي امي هصصص ماتعمل اي صوت
هز راسه وقام من جنبها بهدوء وفات عالحمام
لميس : اهلين ماما
زكيه : وينك ولي
لميس : شبك امي انا بالجامعه
زكيه : ومين الشب اللي كنتي عم تتصرمحي معه بدك تجلطيني بدك العالم يحكوا زكيه ماعرفت تربي
لميس : انتي شو عم تحكي امي هاد اخو رفيقتي ووصلنا عالجامعه بعدين انا ماكنت وحدي معه… اخته كانت معنا
زكيه : اكيد هالحكي لميس
لميس : عم تشكي فيي امي ؟؟
زكيه : لا ياعمري بس هي الكلبه رفاه حكت انها شافتك راكبه مع شب بسيارته
كزت لميس ع اسنانها بغيض : رفاه لكن… ماشي امي صدقيها وكزبي بنتك انا مارح ارجع عالبيت
زكيه : لا يا روحي مصدقيتك حقك عليي خلص ارجعي عالبيت لنتغدا سوا عاملتلك شيخ المحشي
لميس : بس مابدي شوف الست رفاه بالبيت
زكيه : مضطرين نتحملها
لميس : وليش بقى
زكيه : بس ترجعي عالبيت بفهمك
لميس : اوك ماما باي

حطت الموبايل من ايدها وهي عم تغلي من الغضب

ربيع : شبك ياروحي
لميس : اختي الحقيره شافتنا سوا وراحت خبرت امي
ربيع : اي وامك عرفت ؟؟
لميس : لاتخاف دبرتها
ربيع : كتيرر منيح قومي اللبسي لوصلك بطريقي
لميس : ربيع حاول تستعجل لازم نعلن زواجنا
ربيع : قلتلك ماشي شبك لميس بدك اطالعي خلقك فيي
لميس بدلع : لا ياروحي خلقي مابيطلع عليك
ربيع : يسلملي الفهمان

*╚══════ღღ══════╝

داليا : مستر وسام مالك بيك طالبك بمكتبه
حط الملف من ايدو وغمض عيونو واخد نفس طويل لانه عارف انه عمه رح يرجع يفتح معه موضوع الزواج وبعدو مالقي عروس يستأجرها لمده معينه وينفذ بعدها خطته ليكون مع نور قام من مكانه وتوجه لمكتب عمه

وسام : مسا الخير عمي .. حضرتك طلبتني
مالك : اقعد وسام
وسام وهو عم يقعد قبال عمه : خير عمي صاير شي
مالك : فهمني شو هاد… ورمى قدامه فواتير جايه من المانيا
وسام بتوتر : هاد…
مالك : النت يلي شريت هالسياره ماهيك
وسام : اي عمي انا
مالك : لنور خانوم
وسام : شو فيها ازا هديت بنت عمي سياره الخير كتير
مالك : مافيها شي لو هديتها فيلا ماكنت رح اعترض بس تتصرف من ورا ضهري ياوسام عم تخون ثقتي فيك
وسام : بعتزر عمي.مارح تتكرر
مالك : معاك 3 ايام بتكون ملاقي عروس ومتزوج
وسام : بس ياعمي
مالك : مارح عيد كلامي وسام يا اما بتتزوج خلال 3 ايام او بتنسى اني عمك
وسام : لاتفسى عليي عمي اول مره تزوجت ل البي رغبتك ورغبة ابي هالمره اتركني اختار البنت اللي بدي ياها
مالك : قدامك بنات الكون اختار منهم وحده ماعدا بنت كمال
وسام : بس انا بحب نور ومابدي غيرها
مالك بحزم : النقاش خلص وسام فيك تتفضل لمكتبك وفكر بكلامي
شد على قبضته لحتى برزت عروقه مابدو يزعل عمه وبنفس الوقت مابيقدر يتخلا عن البنت اللي بيحبها… كان القرار صعب والاختيار اصعب
رجع لمكتبه ودفن راسه بين كفيه وفجأه لاح بخياله صورة رفاه
شد شعرو بقوه وضرب المكتب بكفه وهو عم يزفر الاه من قلب محروق
وسام : سامحيني رفاه بعرف مالك زنب بس بوعدك ما اتخلا عنك واعوضك
معقول توافق… . ليش لا هالعرض مارح تلاقي متله بحياتها ورح اعطيها مبلغ يكفيها لتعيش حياه كريمه واكتبلها بيت ب اسمها
ماعاد عندي وقت لازم اتحرك بسرعه… ضغط على الانتر كام بمكتبه

وسام : داليا ابعتيلي ناصر فورا
داليا : امرك مسيو وسام

*╚══════ღღ══════╝

عروس للايجار بقلم امل احمد سلوم الجزء الثاني

رجعت لميس عالبيت وفاتت فورا لغرفة رفاه واطلعت فيها بقرف وحكت من بين اسنانها

لميس : وقت بدك تفسدي عني اتأكدي من الشي يلي شفتيه ياخانوم
نزلت رفاه الكتاب من ايدها وبادلتها نفس النظره
رفاه : ازا ضحكتي على امك بكلمتين مافيك تضحكي عليي انا بعيوني شفتك
لميس : شو ماكان يلي شفتيه مابيعنيكي ياريت تلتهي بحالك احسن ماتنزتي بالسقاق
رفاه : ممكن تتركيني التهي بحالي وتروحي لغرفتك
لميس : عم تتحديني
رفاه بثقه : اعتبريه هيك
لميس : شي حلو والله من ايمت طالعلك مخالب ياقطه
رفاه : من اليوم
زكيه : انتي جيتي حبيبتي تعي لتتغدي
لميس : امي يا انا يا رفاه بالبيت
زكيه : تتعي لميس بدي ياكي
رمقتها بنظرة تحدي وكره وفتلت حالها وطلعت لعند امها
لميس : امي هالكلبه مالها قعده بالبيت
زكيه : فكرك طايقتها ولا طايقه وجودها بس مضطره اتحملها
لميس : لاتجننيني امي ليش مضطره تتحمليها
زكيه : الخانوم اشتغلت بشركه كبيره ورح تاخد معاش منيح
لميس بمسخره : كم يعني 😏
زكيه : 500 دولار
لميس بصدمه : شوووو وكيف عترت على هالوظيفه
زكيه : الله يعدمني ياها حظها بيفلق الصخر لهيك امي مابدي تحتكي فيها وطنشيها ولا كأنها موجوده ع القليه بنستفيد من معاشها
لميس بخبث : هه ازا هيك الموضوع تكرمي زوزو
زكيه : وانتي اتلحلحي شوي شو وضعوا اخو رفيقتك معه مصاري
لميس بتلعثم : اه ااايه عندو مطعم
زكيه : ولي عكسرتك اتلحلحلي لك بنتي بلكي بيجي يخطبك
لميس : ماتخافي عليي امي بنتك صاحيه
زكيه : اللهي سيدي ومولاي يكون من نصيبك وتكسري عين بنت ابتسام واشفي غليلي منها

*╚══════ღღ══════╝

بيقطع حديثهم صوت جرس الباب وبتروح زكيه لتفتح وبتتفاجئ بشبين متل القمر وباين عليهم بشاوات

زكيه : اهلا وسهلا مين حضرتكم
ناصر : انا ناصر مدير العلاقات العامة بشركة الخطيب يلي كان بيشتغل فيها المرحوم زوجك وهاد السيد وسام بيك صاحب الشركة
بلعت ريقها وبقيت واقفه مكانها
زكيه بخوف : والله زوجي كان درويش على باب الله
ناصر : مو جايين كرمال زوجك ياخانوم
زكيه ببلاهه : اه لكن ليش جايين بلا زغره
ناصر : شو رح نحكي هون
زكيه : كرمال الله ماتواخزوني من لبكتي نسيت قلكم تفضلو… اتفضلو يامية اهلا وسهلا زارتنا البركه ماتواخزوني البيت مو قد المقام نحنا متل مو شايفين معترين
ناصر وهو عم يتفحص البيت بعيونه ويقعد ب اكابريه : تمام تمام… ممكن تنادي ل الانسه رفاه
زكيه : اااه رفاه ليش شو بدكم منها اكيد عامله شي فصل ناقص الله لايوفقها شو عامله مقصوفة الرقبه
وسام : اهدي ياخانوم انا جاي اطلب ايد الانسه رفاه
زكيه : 😲😲😲😲😲

عروس للايجار بقلم امل احمد سلوم الجزء الأول

عروس للايجار بقلم امل احمد سلوم الجزء الثاني

عروس للايجار بقلم امل احمد سلوم الجزء الثالث

عروس للايجار بقلم امل احمد سلوم الجزء الرابع

عروس للايجار بقلم امل احمد سلوم الجزء الخامس

عروس للايجار بقلم امل احمد سلوم الجزء السادس

عروس للايجار بقلم امل احمد سلوم الجزء السابع

عروس للايجار بقلم امل احمد سلوم الجزء الثامن والأخير

 

admin

رأيان حول “عروس للايجار بقلم امل احمد سلوم الجزء الثاني

اترك تعليقاً

لن يتم نشر عنوان بريدك الإلكتروني.

error: Content is protected !!