عروس للايجار بقلم امل احمد سلوم الجزء الثالث

عروس للايجار بقلم امل احمد سلوم الجزء الثالث

عروس للايجار بقلم امل احمد سلوم الجزء الثالث

عروس للايجار بقلم امل احمد سلوم
عروس للايجار بقلم امل احمد سلوم

زكيه : وبلا مؤاخزه حضرتك من وين بتعرف رفاه
وسام : رفاه توظفت اليوم بشركتي
زكيه بقلبها : العما بقلبها كيف حسنت اطبقوا للرجال من اول يوم
وسام : انا كتير مستعجل وبدي كتب الكتاب يكون الليله
زكيه : الليله !!! لشو العجله انت مابتعرفها لرفاه يمكن مابتناسبك
وسام : لا بتناسبني وكتير لو سمحتي تندهي عليها
قامت زكيه وقعدت حد وسام وهمست : ازا بدك عروس بجوزك وحده احلا من رفاه .واصغر منها.مربايه ومتعلمه وفهمانه وست بيت
وسام وهو عم يحط 5000 الاف عالطاوله : وانا قلت بدي رفاه ياخانوم
اطلعت بالمصاري وبحلقت ومدت ايديها تتناولهم بعجل قبل ما يغير رأيه
زكيه : انت بتؤمر يابيك دقيقه لناديها
هز راسه وقامت زكيه تهرول لغرفة رفاه وهي كاتمه غيضها
ناصر : الهيئه عرفت نقطه ضعفها
وسام : مبين عليها بتعبد القرش وهالشي رح يسهل عليي مهمتي
ناصر : تعجبني يا برنس

وبغرفة رفاه
زكيه : ولي رفاه قومي الله يعدمني ياكي
رفاه : شبك مرت ابي من شوي كنت حبيبتك شو صرلك كل شوي بحال
زكيه : تحبك حيه رقطه اللهي… ولي شو قصتك مع وسام اه
رفاه : مين وسام ؟؟
زكيه : اي اجدبيها عليي لشوف… ولي وسام صاحب الشركه يلي عينك عندو اليوم
رفاه : اها وسام بيك شبو ؟
زكيه : لا يعني درويشه ومابتعرفي شبو اطلعي من هالبواب وردي عليي
رفاه : والله ماعم افهم عليكي يامرت ابي شبو وسام بيك
زكيه : اخ منك شو كاسره شلون وقعتي الرجال بشباكك من اول يوم اه
رفاه : شباكي ؟؟؟
زكيه : وسام بيك بره وجاي يطلب ايدك .. اخخخ بس لو طلبها ل لميس كانت كملت معي… الله يعدمني ياكي دايما حظك سابقك
رفاه بصدمه : شووووووو يطلب ايدي ؟؟؟ متأكده انه اللي بره هوي وسام بيك ؟؟
زكيه : ولي عليكي شو كاسره… وينك ولي بتقومي متل ما انتي وبتفوتي عندهم فهمانه
رفاه : بالبيجامه ؟؟؟
زكيه : اييييي بضراب السخن قومي قدامي لشوف

قامت رفاه ووراها زكيه عم تدفشها وتدعي عليها

لميس : شو في امي مين عنا
زكيه بهمس : فوتي اللبسي احلا شي عندك وتعي عالصالون
لميس : ليش ؟؟
زكيه : بعدين بتفهمي تحركي
لميس : طيب
رجعت ادفش برفاه : انقبري قدامي اللهي كفنك بدياتي ولحقك باللي خلفك

*╚══════ღღ══════╝

فاتت رفاه وهي عم تتأمل وجه وسام
رفاه بقلبها : لك اي والله هاد وسام بيك بس شو عم بيصير
رفاه : ممسسا الخير
وسام وناصر : مسا النور
رفاه : خير وسام بيك صدر مني شي مو منيح
وسام : هههههه ليش انتي بلشتي شغل ليصدر منك شي منيح ولا مو منيح
رفاه : لكن شو القصه
ناصر : بدون مقدمات نحنا جايين نطلب ايدك لوسام
رفاه : ايدي انا ؟؟؟؟
ناصر : اي انتي
رفاه : بس هوي مابيعرفني وماشافني الا مره
ناصر : ماسمعتي بالحب من اول نظرة
نكشو وسام لحتى مايخبص
وسام : ممكن نحكي على انفراد يا انسه
زكيه : اكيد يابيك خود راحتك… . ولي رفاه خدي البيك واقعدو عالبلكون وبلشت تعض عشفايفها وتغمز
رفاه بخجل : تفضل وسام بيك

قام وسام ولحق رفاه وقعدو بالبلكون… كان باين عليها الخجل واللبكه خصوصا انها اول مره تقعد مع حدا غريب لوحدهم

وسام : انسه رفاه انا مقدر الظرف يلي عم تمري فيه واكيد بعدك حزينه على وفاة ابوكي الله يرحمه
رفاه : 😔
وسام : انا جاي اعرض عليكي الزواج بس مو بالشكل المفهوم يعني زواج ومو زواج
رفعت راسها ب استغراب وحكت : كيف يعني زواج ومو زواج شو بتقصد ؟؟؟
وسام : ممكن اهدي لاقدر فهمك
رفاه : تفضل
وسام : انا كنت بقدر اتزوجك وحطك قدام الامر الواقع بس صدقيني انا مو هيك… انا انسان عندي مشاعر متل اي حدا
رفاه : اي
وسام : بصراحه انا بحب بنت عمي ومافي طريقه اني اتزوجها الا اني استأجر عروس
رفاه : شوووووووووو 😲

* ╚══════ღღ══════╝
وبالصاله

زكيه : يامية اهلا وسهلا زارتنا البركه
ناصر بضيق : تسلمي
زكيه : وانت متزوج ولا عزابي
ناصر : عزابي
زكيه بفرح : نشالله الفرحه بتصير فرحتين… لك ياااا لمييييس وين القهوه
ناصر بقلبه : ولي على هالعلقه 😥

فاتت لميس وعيونها بالارض وقدمت القهوه وقعدت بخجل مصطنع
زكيه : هي بنتي الوحيده لميس
ناصر بدون اهتمام : اهلين
لميس بدلع : كيفك ناصر
ناصر : منيح ؟؟؟؟؟
لميس : انت شو بتشغتل
كان على وشك ينفجر فيها و بأمها لكن استوقفه صوت رفاه عم تصرخ

رفاه : لك انت شوووووو مفكر حالك… مفكر لانه معك مصاري فيك تشتريني
وسام : ممكن نحكي بهدوء
رفاه : بعتزر طلبك مو عندي…… تفضل من دون مطرود
وسام : هاد اخر كلام عندك
رفاه : اي ولو كنت اخر رجال بالكون مابدي ياك
وسام : بس انا مارح اطلع من هون الا وانتي مرتي
رفاه : قلتلك مابدي هوي بالزور
وسام بغضب : اي بالزور
وتركها ورجع عالصاله
ناصر : شبكم ليش صوتكم طالع
وسام : ناصر انا غلطت مع هالبنت وانت شاهد ماهيك
ناصر بصدمه : اه… اايه ممزبوط،
رفاه : شوووو يلي مزبوط لك انا من وين بعرفك ما شفتك الا اليوم
وسام : ياخانوم انا جاي صلح غلطتي واستر هالفضيحه وبدي ابني يتربى ببيتي
زكيه وهي بتضرب عصدرها : شوووو وحامل كمان… الله لا يوفقك ياوسخه يافاجره اطلعي من بيتي
رفاه : والله هالحكي كزب يامرت ابي
زكيه : اخرسي ياعايبه يافالته منيح ابوكي مات قبل ما يشوف هاليوم وفاتت على غرفتها وبلشت تزت اواعيها وكتبها
زكيه : لبرا ياوسخه ماعاد الك قعده ببيتي روحي شوفيلك خان عيشي فيه
ركضت رفاه لعند وسام ونزلت عند اجريه : كرمال الله احكي انه هالحكي مو مزبوط
مسكها من كتافها ورفعها وحكا بهمس : موافقه على عرضي
رفاه بدموع : موافقه بس ماتحكي بشرفي ابوس ايدك
ابتسم وسام وحكا بثقه : انا عم امزح ياخانوم كنت بدي شوف ردة فعلك والضاهر انك مره مقدره مابترضي بالزاحله
زكيه : يعني رفاه شريفه
حط ايديه بجيابه واطلع برفاه : طبعا شريفه ولا ماكنت جيت اطلبها زوجه الي
زكيه : واحنا بيشرفنا نصاهرك يابيك
وسام : ماسمعت رأي العروس،
رفاه بعجز : موافقه 😔

وسام : كتير منيح… . ناصر روح جيب الشيخ
ناصر : امرك
زكيه : بس بعدنا ماتفقنا يابيك
وسام : مية الف دولار منيح
زكيه : هاااا 😲
وسام : نخليهم ميتين الف وتنسي وحده اسمها رفاه
زكيه : ليش مين هي رفاه 🤔
وسام : لكن متفقين وانتي رفاه رح اكتبلك مليون دولار وفيلا ب اسمك
رفاه بقهر : مابدي منك شي
تجاهل كلامها وتوجه لزكيه : شو ياخانوم مارح تشربينا شي
زكيه : مووو على عيني انت بتؤمر يابيك شو بتحب تشرب
رفاه : قهوه ساده
وسام : انا فعلا بحبا ساده
رفاه :……
*╚══════ღღ══════╝

وصل المأذون وانكتب كتاب رفاه ووسام عالسكت لانه بعدو ابوها متوفي جديد ووسام مابدو موضوع زواجه ينتشر
وسام : مبروك رفاه
رفاه : مبروك عليك حبيبتك وسام بيك
وسام : ممكن تعطيني ايدك لحتى لبسك المحبس
رفاه : لا
زكيه : ولوا يخلع رقبتك مدي مكسورتك ولي 😡
وسام بحده : ست زكيه اعتقد رفاه هلأ صارت مرتي واحترامها من احترامي وانا ابدا مابسمح لحدا يهين مرتي
بلعت زكيه السانها واتضاهرت بالفرح…
وبعد ماطلع وسام وناصر واخدو معهم رفاه علي صوتها وبلشت ردح وضرب ع اجريها ووجها
زكيه : طوووول عمرها محظوظه بنت ابتسام اااخ لو هالعريس لبنتي شو كان صار
لميس : امي انتي مقتنعه بالشي اللي صار
زكيه : وليش ما اقتنع فرشلها ملايين تحت اجريها وكتبلا فيلا ب اسمها شو بدها احسن من هيك
لميس : بس كأن هالجيزه غامضه
زكيه : شلون يعني
لميس : يعني في سر بالموضوع ولازم اعرفه
وبقلبها… الله لايهنيني ازا يخليكي تتهني بهالجوازه ياست رفاه 😈

*╚══════ღღ══════╝

كان سايق سيارته عالهدا عم يسرق نظرات عليها من مرايته وبقلبه غصه عالشي يلي عمله معها والاسلوب اللي جبرها توافق عالزواج

ناصر : مبروك ياعرسان انا صار لازم ارجع عالبيت
وسام : انا بكرا مو جاي عالشركه غطي ع غيابي
ناصر بخبث : اي محلاك وتجي ياعريس ههههه يالله سلام
وسام : الله معك

بقي الصمت مخيم عليهم ووسام بعدو واقف مكانه
وسام : ممكن تقعدي قدام ..مو حلوه الناس يفكروني الشوفير تبعك
رفاه : الضاهر انك رح تأمرني كتير والمطلوب مني نفذ من تم ساكت
وسام : هالشي مو صحيح ابدا
رفاه : واضح من طريقتك لاجباري اني وافق عليك
فتل حاله عليها وحكا بصوت حنون بعث الطمأنينه لقلبها
وسام : رفاه انا بعترف اني غلطت وطريقتي كانت حيوانيه لكن بترجاكي تقدري موقفي… . اعتبريني اخوكي او صديقك ومحتاج مساعدتك لكن ارجوكي لاتتخلي عني
رفاه : انت ماخليتلي مجال اقبل او ارفض وسام بيك عاملتني كأني شي امه بسوق العبيد وجيت تحررها من العبوديه لتتملكها وحدك
وسام بحزن : لاتظلميني رفاه… . ولاتخليني حس بالزنب
رفاه : مدامها بنت عمك شو المانع انك ماتتروجها
وسام : في بين عمامي مشاكل كتيره ونحنا ضحيتها لهيك رفاه بتمنى تساعديني وتمثلي قدام امي وعمي انك تزوجتيني برضاكي وبوعدك ما المسك ولا قرب عليكي وعاملك متل اختي
رفاه : ولايمت هالمسرحيه وسام بيك
وسام : شهرين مو اكتر وبعدها انتي حره
رفاه : بس مابترك جامعتي
وسام : اكيد لا هاد مستقبلك وطموحك ومارح وقف بوجهك
رفاه : وبدي اشتغل
وسام : بهي اسمحيلي .. طول ما انتي زوجة. وسام الخطيب مافي شغل واللي بتحتاجيه رح يحضر لعندك ومن احسنه
رفاه : مابدي كون حمل عحدا انا بقدر اهتم بحالي
وسام بضحك : انا مو حدا انا زوجك
رفاه : ههههه لا والله جد
وسام : حدا قلك انها ضحكتك بتسحر
رفاه :……
وسام بنظرة رجاء : موافقه رفاه
رفاه :… ..
وسام : الضاهر مو حابه تساعديني خلص رح رجعك ع بيتك ورح طلقك هلأ ازا هالشي بيريحك 😔
رفاه : شهرين مو اكتر وسام بيك
وسام بفرح : شهرين مو اكتر… . شو موافقه
رفاه : موافقه بشرط
وسام : اي تفضلي
رفاه : مابتحكي عروس للإيجار مره تانيه 😡
وسام : ههههههههههههه امرك رفاه خانوم وانا اسف
رفاه : مممممممم
مد وسام ايدو : اصدقاء
مسكت رفاه ايدو وشدت عليها : لا اخوه
وسام : واجدع اخت بالكون .. ممكن تتفضلي بحد اخوكي
رفاه : طبيب
وسام : خليني اخدك عالسوق لجيبلك كم قطعة تياب بلا ماتفوتي بيتك بالاسود… . حتى هو فال مو منيح ما 😉
رفاه : انا لابسته ع روح ابي 😔
وسام وهو حاسس بوجعها لانه كمان يتيم الاب : الله يرحمه الحزن مابيجوز اكتر من تلات ايام ومابعتقد ابوكي رح يرضيه تلبسي اسود ع روحو

كانت عم تسمع كلامه وحاسه بحنيته وصدقه وانصاعت بكل الرضا لتوقف معه وتساعده ليتزوج حبيبته… . لكن ياترى هي نهاية القصه ولا القصه الحقيقيه هلأ بلشت

*╚══════ღღ══════╝

عروس للايجار بقلم امل احمد سلوم الجزء الثالث

اخدها وراحوا عالسوق وتركها براحتها تختار الشي يلي بيناسبها
رفاه : حاج هدول بيكفوا
وسام : خدي اي شي بتحتاجيه
رفاه : مابدي اتعود عالدلع كلهم شهرين
وسام : ومين حكالك بس نطلق رح اتخلا عنك رفاه انتي ملزومه مني لحتى تصيري ببيت زوجك
رفاه : شكرا وسام بيك
وسام : ان شالله ناويه تناديلي وسام بيك عطول
رفاه : لكن شو ناديلك
وسام : وسام وبس
رفاه : حاضر
وسام : تعي معي
رفاه : لوين
وسام : هشششش امشي وانتي ساكته
مشي فيها لحد ماوقفوا عند محل صاغه
الصايغ : اهلا وسهلا وسام بيك ائمرني
وسام : اهلين فيك عم جمال شو عندك اطواق الماس تليق بعروس
الصايغ : اليوم وصلتني تشكيله من الهند شي بياخد العقل بتحب تشوفها
وسام : اكيد
بلش وسام يتفرج ع قطع المجوهرات واختار طوق وحلق وخاتم الماس
وسام ; ممكن تقبلي هالهديه مني
رفاه بدهشه : الي انا ؟؟ بس انت قلت لعرايس
وسام : وانتي شو… قربي لحتى لبسك ياهم
رفاه بخجل : هيك كتير وسام بيك
وسام : شو قلتي 🤨
رفاه : قصدي وسام
وسام : اي هه هيك بدي ياكي… قربي يالله وحاجتك دلال
قربت رفاه بخجل ومد وسام ايديه ليلبسها الطوق
بهاللحظه حست بتيار كهربا عم يسري بعروقها .. بعدت عنه بخجل وهي عم تتحسس الطوق
رفاه : كتير حلو يسلمو وسام
وسام : ممكن تسمحيلي لبسك المحبس مو حلوه تقابلي امي ومافي ب ايدك محبس
رفاه : حاضر 🤗
كانت حاسه بفرحه مو من حقها وامان بتعرف انه مارح يدوم لكنها قررت تساعدو وبدون ماتفكر انها ممكن تكون عم تظلم نفسها وقلبها
اطلعت بعيونو وشافت فيهم لمعه… تمنت لو تتغلغل ببحرهم اكتر لكنها سحبت انفاسها قبل ما تلفظها…… اهو فعلا الحب !!! ام انه شعور غريب من فيض الحرمان ؟؟

كانت عيناه تشبهان “مائة عام من الأمان” )

*╚══════ღღ══════╝

وصلوا اخيرا على بيت وسام وكانت صدمتها وقت شافت قصر من يلي قرأت عنهم بكتب الف ليله وليله
نزلت من السياره بخوف من المجهول وشو ممكن تكون ردة فعل ام وسام وقت تعرف انه ابنها اتزوج بدون علمها
اسئله كتيره كانت مسيطرة على تفكيرها وهي ماشية بخجل ورا وسام لحتى وقف عند باب فخم منحوت برسوم فرعونيه اصيله
وسام : جاهزه
بلعت ريقها بخوف وهزت راسها
دق الباب واجاه صوت دافي بيئذنلو بالدخول
وسام : مسا الخير ياست الكل
راويه : مسا النور حبيبي… ليش تأخرت لهلأ
وسام : بصراحه مو جاي لوحدي
راويه : معك ضيوف
وسام : ممممم تقريبا… . واشر لرفاه بالدخول
رفاه وعيونها بالارض : مسا الخير
راويه بنظره تفحصيه سريعه من تحت نظارتها الطبيه : مسا النور بنتي…… . مين هالحلوه وسام
تقدم وسام لعند امه وباس ايدها واردف بصوت عميق : هي مرتي
هالكلمه دغدغت كيان رفاه وحست بنار عم تشعل فيها
راويه : مرتك ؟؟؟
وسام : اي امي اتزوجنا اليوم
راويه : هيك ياوسام
وسام : امي هاد اختياري لو سمحتي
راويه : ارفعي راسك وقربي لهون بنتي

رفعت رفاه راسها لتشوف مره مقعده على كرسي متحرك بوجه بيفيض منه النور والحنيه… . حست وكأنه مي بارده انسكبت عليها لمجرد مالمحت عيونها اللي عم تشع بريق من تحت نظارتها وصوتها العذب يلي تسلل لجوات قلبها بدون استزان

رفاه : نعم يا خانوم
راويه : اقعدي حدي
رفاه ب ادب : حاضر
راويه : شو اسمك بنتي
رفاه : اسمي رفاه
روايه : الله شو هالاسم الحلو هاد
رفاه : شكرا ياخانوم
راويه : وبيرضيكي يارفاه ابني الوحيد يتزوج بدون علمي
رفاه بتوتر : اكيد لا ياخانوم بس وسام بيـــ قصدي وسام اضطر يكتب كتابه عليي لانه ابي اتوفى من مده بسيطه ومالي حدا الا مرت ابي وبدها ترجع عند اخوانها
انبسط وسام من رد رفاه واطلع ب امه
وسام ; معلش ياست الحبايب متل مانك شايفه الشغله اجت عغفله ومالي غنى عنك انتي تاج راسي
راويه : انا شو بدي من هالدنيا الا اشوفك مرتاح ابني وشوف ولادك قبل ماموت
رفاه بعجل : بعيد الشر عنك امي
راويه : امي ؟؟
رفاه : ااانا اسفه بس مابحب سيرة الموت بتزكر امي
حست راويه بالحزن على هالبنت اليتيمه وانكسارها
راويه : بس انا مازعلت حبيبتي ومن اليوم وطالع بتناديلي امي مفهوم
رفاه بدموع حاره : حاضر امي
راويه : وهلأ خود عروستك وروحوا ارتاحوا والصبح تعا لعندي وسام
وسام : امرك امي
وقفت رفاه بخجل : عن ازنك امي تصبحي على خير
راويه : تلاقي الخير بنتي… .. وسام
وسام : نعم امي
راويه : دير بالك ع رفاه هيه من هاللحظة امانه برقبتك
وسام بغصه : حاضر امي… . بالازن

*╚══════ღღ══════╝

نور : بابا عم اتصل على وسام ماعم يرد عليي
كمال : ههههههه اكيد ملتهي مع عروسته
نور : هو اتجوز 😲
عصام : وشبك انصدمتي لتكوني جد بتحبيه ولي
نور : بلا حكي فاضي انا مستعده حب عزائيل ولاحبو
عصام : لكن خبي معالم وجهك هي كاشفيتك كتير
نور : لك جد انت مو طبيعي انا انصدمت لانه الاتفاق بينا يخبرني اول ب اول
كمال : الضاهر مالك حطو قدام الامر الواقع لهيك استعجل بالزواج
نور : ولو المفروض يخبرني… 😡
عصام : متأكده بتكرهيه
نور : يوووه انا رايحه لغرفتي
عصام : بطريقك خدي حبة مهدي اختي… .. اي ابي شو رح نعمل هلأ
كمال : رح نستغل عصبية اختك لصالحنا
عصام : شلون
كمال : الصبح بتعرف 😈

*╚══════ღღ══════╝

ماشيه ورا وسام عم تتفرج على كل ممر وردهه بالقصر ب اعجاب
وسام : عجبك بيتنا
هزت راسها : اي ماشالله حلو كتير
وسام : طيب تفضلي لتشوفي عرفتك وفتح باب غرفه اكبر من كل بيتها
رفاه بصدمه : شو هاد 😲
وسام : شو رأيك
رفاه : بجد تحفه وكل الاثاث انتيكه وشي فخم
وسام بحزن : هاد اختيار ابي الله يرحمه
حست رفاه بالحزن المستوطن بقلب وسام على وفاة والده
رفاه : كنت بتحب ابوك
وسام : كان كل حياتي
رفاه : الله يرحمه انا كمان ابي كان كل حياتي بس هي سنة الحياة
وسام : معك حق
رفاه : طيب وسام انا بدي ارتاح خلص فيك تروح لغرفتك
وسام : بس انا بغرفتي
رفاه : وليش جايبني على غرفتك 😲
وسام : يارفاه ياعيني نحنا قدام الله وقدام الناس زوجين يعني مافيها شي ازا نمتي بغرفتي وياستي ماتخافي رح تنامي عالتخت وانا عالكنبه بس المهم ماحدا يحس عشي حاليا
رفاه وهي عم تفرك ايديها بتوتر : طيب ممكن تتركني اخد شور وبدل تيابي
وسام : اي طبعا… انا نازل جيب موبايلي نسيته بالسياره وانتي خدي راحتك
هزت راسها وتركها وراح
رفاه بقلبها : معقول يلي عم بعمله صح .. يارب ساعدني 😔

*╚══════ღღ══════╝

عروس للايجار بقلم امل احمد سلوم الجزء الثالث

نزل على سيارته وتناول موبايله
وسام : ياربي نور اتصلت 33 مره انا كيف نسيت حاكيها… .. وضغط على زر الاتصال

وسام : كيفو حبيبي
نور : مبروك ياعريس تتهنى
وسام : هههههههه لك مين خبرك
نور : مو بحاجة حدا يخبرني…
وسام : دخيلو العصبي ما احلاه… . صدقيني اضطريت استعجل عمي مالك كان عم يضغط عليي وخفت ضيع البنت اللي لاقيتها
نور : حلوه
وسام : شو هي الحلوه
نور : وسام لاتجدبها عليي عم اسألك عالعروس حلوه
تزكر وسام معالم وجه رفاه وبرائتها… . واطلع لفوق شافها واقفه ع البلكون بتطلع عليه
وسام وعيونه ع رفاه : بصراحه حلوه
نور : ومن اي مزبله جبتها
وسام : ليش عم تحكي عنها هيك ..
نور : والله يلي بتوافق تكون عروس للايجار بتكون زباله
وسام : اولا هي مو عروس للايجار انا يلي جبرتها توافق
نور : انت ناوي تجنني عالخالص ما
وسام : شو رأيك شوفك بكرا الصبح
نور : مارح تروح عالشركه
وسام : لا
نور بعصبيه : لكان ياعمي عريس
وسام : هههههههههههههههههههههههههه

كانت رفاه عم تراقب وسام وبتضحك وهي شايفته فرحان وبقمة سعادته
رفاه : اكيد عم يحكي مع بنت عمه… ايييييه الحب بيعمل اكتر من هيك نشالله بالاخر تنجح هالخطه ويقدرو يتزوجو

ومن وسط العتمه لمحت شي عم يلمع ديقت عيونها لتعرف شو هالشي

وسام : بتعرفي شو طقوا خواصري من الضحك
نور : ماشي ياوسام بس شوفك

حط الجاكيت ع كتفه وبقي سارح وعم يحكي مع نور ومتوجه لباب القصر

وسام : اي وبس تشوفيني شو رح تعملي
نور : شي مابيخصك هه 😭
وسام : لاياروحي ماتبكي خلص قليلي شو بدك وانا جاهز

وهون شاف رفاه طالعه من باب القصر عم تركض ب اتجاهه وتصرخ
رفاه : انتبه وساااااااااااااااااااااام
وقع الموبايل من ايدو من صدمته وفتل حالة لورا ليشوف قناص مصوب بندقيته على صدره… ما لحق يسحب فردو كان صوت الرصاص عم يهز ارجاء القصر
رفاه : وسااااااااااااام

 

عروس للايجار بقلم امل احمد سلوم الجزء الأول

عروس للايجار بقلم امل احمد سلوم الجزء الثاني

عروس للايجار بقلم امل احمد سلوم الجزء الثالث

عروس للايجار بقلم امل احمد سلوم الجزء الرابع

عروس للايجار بقلم امل احمد سلوم الجزء الخامس

عروس للايجار بقلم امل احمد سلوم الجزء السادس

عروس للايجار بقلم امل احمد سلوم الجزء السابع

عروس للايجار بقلم امل احمد سلوم الجزء الثامن والأخير

 

admin

لا تعليقات بعد على “عروس للايجار بقلم امل احمد سلوم الجزء الثالث

اترك تعليقاً

لن يتم نشر عنوان بريدك الإلكتروني.

error: Content is protected !!