عروس للايجار بقلم امل احمد سلوم الجزء الرابع

عروس للايجار بقلم امل احمد سلوم الجزء الرابع

عروس للايجار بقلم امل احمد سلوم الجزء الرابع

عروس للايجار بقلم امل احمد سلوم
عروس للايجار بقلم امل احمد سلوم

#عروس_للإيجار
#الجزء_الرابع
#بقلمي_امل_احمد_سلوم. (◕‿◕✿)

*╚══════ღღ══════╝

ساند حاله عالحيط وعيونه معلقه بالسقف مو حاسس بشي وكأنه بعالم تاني صوت الصخب حواليه واللي فايت واللي طالع من غرفة العمليات ماعم يحس ولا يشعر كل تفكيرو عند رفاه وكيف رمت حالها قدام الرصاص لتنقذه

*╚══════ღღ══════╝
فلاش باك

وسام : لا ياروحي ماتبكي شو بدك انا جاهز
رفاه : انتبه وسااااااااام
وسام : رفاه ؟؟
فتل حاله وشاف قناص مصوب بندقيته عليه ما لحق يسحب مسدسه كانت رفاه راميه حالها قدامه واتلقت الرصاصه عنه
رفاه : وسااااااام… ااااااااه
ووقعت بحضنه بجسدها الهزيل بوسط دهشته
رفاه ردي عليي كرمال الله اصحي لاتموتي رفاااااه
حملها بين ايديه وحطها بالسياره وطلع عالمشفى ب اقصى سرعه

وسام : رفاه ازا بيصرلك شي مارح سامح حالي عم تسمعيني رفاه ردي عليي اصحي لحتى خلصك من هالقيد يلي حبستك فيه… .رفاااااااااااااااه

*╚══════ღღ══════╝

عــــودة 🔙

مالك : وسام ابني انت منيح
وسام : اي عمي انا منيح
ناصر : شو يلي صار
وسام : رفاه يا ناصر رفاه تقوصت لتحميني

حط ايديه على وجهو وانهار بنوبة بكي… كيف البنت يلي جبرها تتزوجو وتقبل تكون عروس للايجار لحتى يوصل لحبيبته هي يلي انفذت حياته من الموت… شعور لا يوصف كان حاسس فيه ممزوج بحسره والم

مالك : مين رفاه
ناصر : مرتو لوسام
مالك : مرتو ؟؟
ناصر : اي امبيرحه كتبو كتابهم
مالك وهو بياوسي وسام : ان شاء الله رح تكون بخير
وسام ب انهيار : انا اتزوجتها لارضيك عمي انا جبرتها تقبل بهالوضع غصبا عنها بس لحتى اتزوج نور… انت السبب عمي لو ما وقفت بطريق زواجي من نور ماكان صار كل هاد انت السبب… ازا صار لرفاه شي مارح سامحك وخطيتها برقبتك
ناصر : اهدى وسام الامور مابتنحل بهي الطريقه
وسام : انا ماعاد بدي كفي هالمسرحيه بنات الناس مو لعبه… . انا ماعاد بدي شي الا اطمن ع رفاه وبس

بهاللحظه طلع الدكتور وتوجه الكل لعندو
وسام : طمني دكتور كيف وضعها
الدكتور : انت شو بتكون الها
وسام : انا زوجها
الدكتور : حمدلله عسلامتها الرصاصه اجت بكتفها وقدرنا نطالعها .. بس هيه نزفت دم كتير لهيك رح تبقى بالمشفى كم يوم
وسام : يعني مافي اي خطر على حياتها
الدكتور : اطمن مرتك متل الفل وبعد شوي رح نطالعها على غرفتها
راحه كبيره حسها وسام .. حط ايدو على صدرو واخد نفس طويل
ناصر : وهي اطمنت عالمدام ممكن تروق
مسح دموعو بكفيه واردف بصوت مخنوق : مابتتخيل لو كان صرلا شو كان صار فيي … لك امي حكتلي رفاه صارت امانه برقبتك وانا مو قد هالامانه ناصر
مالك : بنت مين هيه
ناصر : بنت عبدالله اللي كان يشتغل فراش بالشركه
مالك : الفقر مو عيب ابدا… .. بس ياترى على شو ناوي وسام
وسام : رح سلم الشركه وطلق رفاه واتزوج نور ياعمي
مالك : هيك انت بدك
وسام : اي
مالك يلي بريحك ساويه……بس من هاللحظة بتترك مفاتيح سيارتك والفيزا كارت وعالشركه ماعاد الك فوته
وسام :………

تركه ومشي وهو عارف انه رح يرجع بعد مايتلقى صدمه موجعه تصحيه من اوهامه

*╚══════ღღ══════╝

ناصر : انت مستوعب الكلام يلي قلته
وسام :… ..
ناصر : لك ضيعت كل شغلنا عالفاضي
وسام : اتركنا من هالموضوع هلأ
ناصر : اي تركتك وسام انت حر
وسام : بالك مين الو مصلحه بموتي
ناصر : اكيد شي حدا من منافسينا عالمناقصه الجديده
وسام : مابعتقد الموضوع اله علاقه بالشغل
ناصر : لكن شو ؟؟
وسام : في حدا تعمد يعمل هالشي وبهاليوم بالزات
ناصر : اشمعنى
وسام : لحتى ينكشف موضوع رفاه
ناصر : موضوع زواجك من رفاه محدا بيعرف فيه غيري قصدك انا اللي ورى هالشي
وسام : لاتخبص ناصر انت بتعرف اني بثق فيك ثقه عميا
ناصر : لكن شو قصدك
وسام : لقيت 33 مكالمه من نور ووقت اتصلت عليها كانت عارفه وباركتلي فورا قبل ما انا خبرها بشي
ناصر : ليكون في حدا عم يراقبك ؟
وسام : واللي عم يراقبني ليش ليخبر نور… معناته عم يشتغل لحساب نور وهالشي مستحيل
ناصر : لكن نور كيف عرفت
وسام : هاد يلي لازم اعرفه

قطع كلامهم صوت الممرضه
الممرضه : المدام رفاه صارت بغرفتها يابيك
وسام : الحمد لله
ناصر : روح اطمن عليها وانا رايح عالشركه
وسام : ماشي بشوفك
ناصر : سلام

تركه وراح بخطوات سريعه لغرفه رفاه وبهالوقت

ناصر : الو معلم وسام بلش يشك انه في حدا حاول يكشف موضوع رفاه لمالك بيك وماكان الهدف موته…..
كمال : خليك متابع معه واصحك يحس انك بتشتغل لحسابي
ناصر : اؤمرني يابيك شو ساوي هلأ
كمال : مهمتك حاليا توقع بين مالك ووسام
ناصر : هالشي حصل تقريبا ومالك بيك قلعوا من الشركه
كمال : عال عال معناته وسام هلأ صار ب ايدي… وافيني بكل جديد
ناصر : امرك يابيك

*╚══════ღღ══════╝

فات لعندها وشافها نايمه متل الملاك شعرها الاسود مفرود ع مخدتها ووجها الدبلان بعدو بيسحر رغم الحزن اللي كاسيه
قرب منها ومسك ايدها
وسام : حمدلله عسلامتك رفاه
رفاه بتعب : اانت منيح وسام
وسام. : انا منيح بفضل الله وبفضلك رفاه انتي كنتي رح تموتي بسببي
رفاه : الحمد لله قدر ولطف… . مين هدول يلي بدهم يقتلوك
وسام : صدقيني رح اعرف واقتص منهم بس المهم هلأ اني اطمنت عليكي
ابتسمت بود وبعدت عيونها عنه بخجل
وسام : رفاه
رفاه : نعم
وسام : ماعاد في داعي تكفي بهالمسرحيه
رفاه : مافهمت
وسام : انتي طالق
رفاه :………………
وسام : شكرا لكل شي عملتيه معي انا مافيي ورطك معي اكتر من هيك
رفاه :… .
وسام : ارجوكي ماتسكتي هيك
رفاه : شو بدك ياني احكي امبيرحه اتزوجتني بدون ارادتني واليوم طلقتني بدون ماتسألني… الموضوع منتهي وسام وانا مابدي منك شي بس اتركني بحالي
وسام : انا وعدتك وقف معك
رفاه : وانا مابدي مساعدتك وسام معي راتب ابي فيي عيش منه لحتى لاقي شغل
وسام : رفاه ؟؟
رفاه : ممكن تتركني وحدي
وسام : رح اتركك هلأ لترتاحي والمسا برجعلك
فتل حاله ليطلع واستوقفه صوت رفاه : وسام
التفت عليها : اي رفاه
رفاه : انتبه عحالك من اقرب الناس الك
وسام : مين بتقصدي
رفاه : اطلع حواليك منيح بتعرف مين عدوك
وسام : انتي شفتي يلي حاول يقوصني
رفاه :…… ..
وسام : شكرا رفاه… انا رايح

بعدت وجهها عالجهه التانيه لحتى مايلمح الدمعه يلي علقت بطرف عينها وبس سمعت صوت الباب انفتح واتسكر غمضت عيونها بأسى وتركت العنان لدموعها يغسلو جروح قلبها
رفاه : لك انتي ليش عم تبكي .. لسه امبيرحه عرفتيه وامبيرحه تزوجتيه حاج رفاه ماتخلي مشاعرك تسوقك للهاويه… وسام مو الك اصحي من اوهامك… . هوي تزوجك لحتى يوصل لبنت عمه اصحي اصحي 💔
بس انا لازم نبهه وقلو مين الشخص يلي حاول يقتله ؟
لا لا اكيد مارح يصدقني… .. ياربي ساعدني

*╚══════ღღ══════╝

طلع وسام من المشفى بعد ماوصى الدكتور على رفاه ودفع الفاتوره وتوجه لبيت عمه ليشوف نور ويفهم منها كيف عرفت بموضوع زواجه قبل مايخبرها… من وين تسرب الخبر ومافي حدا بيعرف الا ناصر !!!
وصل لبيت عمه ووقف بمكان بعيد عن البيت ومسك موبايله ليتصل بنور وقبل مايضغط على زر الاتصال شاف نور طالعه بسيارتها الجديده ب اتجاه السوق… نزل الموبايل من ايدو ولحقها وبقي وراها لحتى شافها دخلت على كوفي شوب بمكان مزوي بعيد عن العين
وسام : شو جاب نور لهيك مكان ؟؟؟
ترجل من سيارته وفات عالمكان يلي فاتت عليه نور… كان تقريبا مكان للعشاق كل شب حاضن بنت وعايشين جوهم بغير دنيا بقي يمشي بخطوات بطيئة عم يحرك حجر عينه بين العالم السكرانه اللي عم يترنحوا بملابس فاضحه… اضائه خافته ودخان عم يطاير هون وهون وريحة الخمره بتلعي النفس ومن بين هالجمع والعالم الوسخه شاف نور بحضن شب وعم يبوسها من تمها ويحضن فيها وهي مستمتعه وغايبه عن الوعي ب احضانه وماحست ع وجود وسام ولا اي حدا
بقي واقف مكانه بين مصدق ومو مصدق شد على قبضته وبرزت عروقه ووصل لمرحلة الغليان وتقدم خطوه ليواجه نور بحقيقتها
وسام بصوت جهوري : نوووور
نور بصدمه : وووسام 😥
وسام : اي وسام ياوسخه وضربها كف متل فراق الوالدين ومسك الشب يلي كانت معه من جاكيته وبس وضحت الرؤيا بعيون وسام فتح عيونو على وسعهم وحكا بصوت مخنوق : ناصر ؟؟؟؟؟؟
واتزكر كلام رفاه : اطلع حواليك منيح بتعرف مين عدوك

ناصر : اي ناصر ياوسام
وسام : ياخاين يا حقير ياندل لك انت يطلع منك كل هالشي
نترو ناصر بقوه : اي ياوسام بيك ومستعد خلص عليك بهاللحظه وما اسأل عنك
وسام : معناته انت اللي خبرت نور عن زواجي برفاه
ناصر : هههههههه لا بصراحه خبرت معلمي
وسام : معلمك ؟؟
ناصر : اي كمال بيك زوج خالتي ونور مرتي حبيبتي
وسام : شووو
ناصر : وانا يلي قوصت عليك امبيرحه بس الغبيه اللي تأجرتها خلصتك من الموت
وسام بغضب : والله لاطلع بروحك يا واطي يا حقير
هجم عليه ولكمه بقوه على وجهو ورجع ناصر ردلو اللكمه وعلقت بين الشباب
ناصر ب ابتسامه صفرا : انت انتهيت يا برنس
وسام : فشرت يا واطي
وهون تلقى وسام ضربه قويه على راسه افقدته الوعي
ناصر : عاش يمينك ابن خالتي
عصام : شفته وهو لاحق نور وحسيت حيصير شي نحنا لازم ناخدو عالمخزن بعد بكير لنكشف اوراقنا
ناصر : لكان ساعدني لنشحطوا عالسياره وانتي نور ارجعي عالبيت وخبري كمال بيك باللي صار وخليه يلحقنا عالمخزن
نور : رح تقتلوه
ناصر : تحركي نور
نور : حاضر

*╚══════ღღ══════╝

نايمه بتختها وفجأه حست قلبها انقبض ونفسها داق
رفاه : وسام .. وسام صايرلو شي ياربي دخيلك شو هالشعور هاد ليش هيك قلبي عم يخفق بسرعه
سندت حالها ووقفت وراحت ب اتجاه البااب وهي عم تلهت ودموعها بعرض وجهها : ووسسسام وسام
الممرضه : شو عم تعملي يا مدام هيك ما بيصير ارجعي لتختك ازا سمحتي
رفاه : انا لازم روح نبه وسام قبل مايصيرلو شي
الممرضه : اهدي يا مدام لو سمحتي
رفاه : لك بعدي عني هييييك بدي رووووح
نادت الممرضه ع الدكتور يلي اجا بسرعه واعطا رفاه ابرة مهدئ ورجعوها لتختها
رفاه : اتركوني ب بدي روح نبه وسام ات اتركوني
وغمضت عيونها وغابت عن الوعي

*╚══════ღღ══════╝

وبالمخزن
عصام : نورت ابن عمي
وسام : فكني يا حقير ياندل
عصام : هههههه رح فكك ليش مستعجل بس وقتها حتكون ميت
وسام : شو بدك عصام
وسام : هلأ بلشت تحكي حكي مدوزن… .
وحط عقود قدامه
عصام : بدي توقيع صغير هون يا ابن عمي
وسام : ازا بدك تقتلني اقتلني هلأ لاني مارح وقعلك على اي شي
قرب منه ولكمه بقوه : رح توقع غصبا عنك والا رح تترحم عالست الوالده
وسام بغضب وهو عم يحاول يفك حاله : ازا بتقرب من امي رح ادفنك مطرحك يا واطي
عصام : لكن اختصر على امك العاجزه البهدله اخر عمرها ووقعلي على التنازل بكل شركات الخطيب
وسام : عطيني قلم
قرب منه عصام ومدله قلم : تفضل ابن عمي
وسام : اتفووووووو هاد هوي توقيعي ياريت يكون وصلك
مسح لحيته وكز ع اسنانه وشلح حزامه ورفع ايدو ليضرب وسام
كمال : عصااااااام
عصام. : نعم. يابي
كمال : اتركو نحنا مو هيك بنعامل ضيوفنا
عصام بخبث : امرك ابي
سحب كمال كرسي وقعد قبال وسام
كمال : شو وسام مو ناوي توفر عليك وعلينا التعب
وسام : لو تشوف حلمة دانك مارح وقع على شي
كمال : تشوك تشوك تشوك هيك بدك تزعلني منك
وسام : كنت بسمع انك حقير بس ماكنت مصدق ياريت سمعت عمي مالك وماقربت منك ومن بنتك الحقيره
ضربه كمال كف وحكا بصوت اشبه للفحيح : لسى ماشفت شي من حقارتي
وسام : اعمل يلي بدك ياه مارح وقعلك عشي
كمال بغضب : عصااااااااااااام
عصام : ائمرني يابي
كمال : اكرموا منيح لضيفنا
عصام بخبث : مو على عيني 😈

*╚══════ღღ══════╝

رايحه جايه بغرفتها عم تفرك ايديها بتوتر وخوف
ناصر : شبك نور
نور : اكيد ابي هلأ رح يقتل وسام
ناصر : وانتي بشو بيفرق معك هالموضوع
نور : نحنا كان اتفاقنا نستولي على ثورة الخطيب ما كان الدم بحساباتنا ابدا
ناصر : هو اجا لقدرو ب اجريه
نور : شو ماصار هاد ابن عمي يا ناصر
ناصر بعصبيه : ابن عمك يلي حارمك وحارم اهلك من حقهم بالورته… ليكي نور انتي مهمتك انتهت ماتدخلي بشي بعد هلأ واتركي الموضوع لابوكي
نور : اه… ااايه صح كلامك…
ناصر : هيك بدي ياكي يامرتي ياحبيبتي
نور : صحيح البنت اللي تزوجها ماتت ؟؟
ناصر : لا الرصاصه اجت برانيه بكتفها بكرا بتطلع وبتتنعم بالعز اللي تركلا ياه وسام
نور بخبث : والله هالموضوع اجا من نصيبها بيوم وليله صارت مرتو لوسام وانكتبلا الشيئ الفلاني
ناصر : بنت درويشه خليها تتنعم بالعز
نور : هي ب اي مشفى
ناصر : بمشفى الشفاء
نور : ايوا… يالله عليها العافيه
ناصر : وقت قوصتها اجت عيني بعينها
نور : وعرفتك ؟؟؟
ناصر : ما بعرف
نور : شو رأيك اروح اجس نبضها وهي اساسا مابتعرف اني مرتك ورح عرفها عحالي اني حبيبة وسام
ناصر وهو بيحك دقنه : كلام معقول قومي لوصلك
نور : لا شو توصلني خلص انا بروح لحالي مابدي حدا يشوفنا مع بعض حاليا
ناصر : بيعجبني تفكيرك الشيطاني… تمام روحي وانا رح ارجع عالشركه شمشم الاخبار
نور : لا خليك هون بلكي احتاجك ابي وعصام
ناصر : قولتك هيك
نور : اه… ايه طبعا خليني ساويلك قهوه وروح مشواري
ناصر : روحي انتي انا بساوي القهوه
نور : لا حبيبي انا بساويها
ناصر : يسلملي الحنون
فاتت نور عالمطبخ بسرعه عملت القهوه وتناولت من الدرج علبة المنوم وحطت بالفنجان نقطتين وصبت القهوه واخدتها لناصر
ناصر وهو عم يتناول الفنجان : يسلمووون
قعدت قباله بدلع : حبيبي ممكن اطلب منك طلب
ناصر : عيوني انتي بتؤمري
نور : بس ناخد المصاري بدي تاخدني ونسافر باريس
اخد رشفه من القهوه واطلع فيها بشك : باريس
نور بتلعثم اايه شو فيها مابيكفي مارحنا شهر عسل
ناصر : تكرم عينك انا كم نور عندي
بقيت تلاغيه بالكلام لحتى انكفى على وجهو وغاب عن الوعي

قامت بسرعه تناولت موبايله وحطته بجيبتها وطلعت من البيت

الجزء المحذوف من شعورك الجزء الذي تحاول أن تخفيه بكل ما أوتيت من قوة هو الجزء الحقيقي الصحيح منك

*╚══════ღღ══════╝

عصام : شو ما استويت لسه
وسام والدم عم يخفق من تمه : اقتلني وخلصني مارح وقع لو شو ماعملت
عصام : لك والله لنسيك حليب امك والله…
ورجع يضرب فيه وفجأه وصلتو رساله من ناصر
تناول موبايله وفتح المسج
( الشرطه عرفت بمكان وسام في بيناتنا خاين اطلع من المخزن بسرعه )
كز ع اسنانه وصرخ بصوت عالي… الله يلعنكوووووووون
وتوجه لوسام غمض عيونو وفكه عن الكرسي ورجع ربط ايديه لورى وسحبه على سيارته
عصام : معلش يا برنس مضطرين نغير الفندق لحتى نعرف مين الخاين
ماكمل كلمته وكان متكوم ع الارض ونور وراه ماسكه ب ايدها حديده وعم تلهت

*╚══════ღღ══════╝

#يتبـــــــع

(◕‿◕✿)

عروس للايجار بقلم امل احمد سلوم الجزء الأول

عروس للايجار بقلم امل احمد سلوم الجزء الثاني

عروس للايجار بقلم امل احمد سلوم الجزء الثالث

عروس للايجار بقلم امل احمد سلوم الجزء الرابع

عروس للايجار بقلم امل احمد سلوم الجزء الخامس

عروس للايجار بقلم امل احمد سلوم الجزء السادس

عروس للايجار بقلم امل احمد سلوم الجزء السابع

عروس للايجار بقلم امل احمد سلوم الجزء الثامن والأخير

 

admin

لا تعليقات بعد على “عروس للايجار بقلم امل احمد سلوم الجزء الرابع

اترك تعليقاً

لن يتم نشر عنوان بريدك الإلكتروني.

error: Content is protected !!