عروس للايجار بقلم امل احمد سلوم الجزء الخامس

عروس للايجار بقلم امل احمد سلوم الجزء الخامس

عروس للايجار بقلم امل احمد سلوم الجزء الخامس

عروس للايجار بقلم امل احمد سلوم
عروس للايجار بقلم امل احمد سلوم

#عروس_للإيجار
#الجزء_الخامس
#بقلمي_امل_احمد_سلوم (◕‿◕✿)

*╚══════ღღ══════╝

شالت العصبه عن عيونه واطلعت فيه
وسام: نور؟؟
نور : انت منيح
وسام : شي مابيخصك اكون منيح ولا اموت ياخساره يانور
نزلت راسها ب اسف: انا اسفه وسام ماكان بقصدي كزب عليك بس
وسام : بس شو يانور لك انا حبيتك وانتي خنتيني
نور : لااا انا ماخنتك انا انجبرت اكزب
وسام : تكزبي؟
نور: اسمع وسام وافهمني منيح انا ماعمري حبيتك بالعكس كنت بكرهك وشاركتهم لناخد منك كلشي بس وقت وصلت للدم ماقدرت اتحمل
وسام : بس انتي قتلتيني يانور انا حاربت الكل كرمالك
نور : عمك وابوك هنه السبب بكل شي
وسام : لا ترمي اخطائك واخطاء عيلتك عالغير
نور : ابي من حقه يورت متله متل ابوك وعمك ليش ليحرموه من ورته ولا لأنه ابن الضره
وسام : ابوكي كتير ازانا يانور واخر شي عمله حرق المخازن وعمي مالك ماقدم شكوى ضده لانه اخوه بس الطمع عامي عقلب امك وابوكي واخوكي… وللاسف انتي كمان
نور : مو وقته هالحكي لازم اخدك ع المشفى فورا
وسام : مابدي منك شي فيكي تروحي
نور : ماجيت هون وعرضت حالي للخطر لحتى اتركك وروح
وسام : وانا مابدي مساعدة وحده خاينه
نور : قلتلك انا موووو خاينه ناصر زوجي
وسام : زوجك ورايحه تقابليه متل المراهقين بكوفي شوب بعيد عن العين
نور : هي كانت خطة وسام لتشوف بعينك كل شي
وسام : خطه ؟؟؟ وصرخ فيها رووووحي من وجهي مابدي شوفك ياريت متت وماعرفتك على حقيقتك

شغلت السياره بدون ماترد عليه وطلعت عالمشفى

*╚══════ღღ══════╝

قاعد ورى مكتبه الفخم عم يتأمل صورة وسام وهو صغير
مالك : ياريت تفهم انا ليش بدي بعدك عن هالناس ابني… الله يحميك

بيندق الباب وبتفوت السيكرتيره
مالك بيك في صبيه بدها تقابل حضرتك
مالك : ماحكت مين
السيكرتيره : عم تقول انها بنتو للفراش عبدالله
مالك بصدمه : رفاه ؟… خليها تتفضل بسرعه
السيكرتيره : امرك يابيك

فاتت رفاه وكان باين عليها التعب ووجها شاحب وعيونها دبلانين
مالك وهو عم يقوم من مكانه : خير بنتي شو طالعك من المشفى وانتي بهي الحاله
رفاه : الحق وسام يابيك
مالك : وسام ؟؟ ليش شبو وسام
رفاه : يلي حاول يقوص وسام هوي ناصر انا شفته بعيوني
مالك : شوووووو
*╚══════ღღ══════╝

كمال : عصام لك عصام فيق ولا وينو وساااام وينوووو
عصام وهو حاطط ايدو عراسو : مابعرف بعتلي ناصر رساله لحتى اطلع من المخزن لان الشرطه عرفت بمكان وسام وبس حطيته بالسياره في حدا ضربني عراسي وبعدها ماحسيت عشي
كمال بعصبيه : والحيوان ناصر وينوووو
عصام : والله مابعرف يابي
كمال : لكن شو. بتعرف الله يلعنكن انا مشغل معي بهايم
وتناول موبايلو واتصل على ناصر وكان موبايله مسكر
كمال : وكمان موبايله مسكر… لك يافررررررريد
فريد : امرك يابيك
كمال : بتاخد الرجال معك وبتروح لبيت ناصر وبتشحطلي ياه لهون عم تفهم
فريد : حاضر يابيك
عصام : معقول يكون ناصر هربو لوسام ؟؟ مستحيل
كمال : بلعبتنا كلشي جايز

*╚══════ღღ══════╝

رفاه : وهاد كل اللي صار يابيك
مالك : ازا هالحكي مزبوط معناته حياة وسام بخطر
وقفت ومسكت ذراعه بخوف
رفاه : كرمال الله دور عليه واحميه
مالك : ماتخافي بنتي رح لاقيه بوعدك
وقطع حديثهم رنة موبايل مالك
مالك : الو نعم… . نور ؟؟؟… شووو ووسام وينو هلأ ؟؟……… طيب انا جاي فورا
رفاه : خير شبو وسام
مالك : متعرض للضرب وهو هلأ بالمشفى
حطت ايدها عتمها وشهقت بخوف : مين يلي ضاربو اكيد ناصر
مالك وهو بيتناول مفاتيح سيارته : هالشغله كبيره على ناصر انا رايح افهم الموضوع
رفاه : وانا جايه معك

نسيت المها وجرحها… نسيت انه اتزوجها ورجع طلقها ماكان شي شاغل تفكيرها الا انها تطمن عليه
بس ليش هيه هلقد خايفه عليه ؟ سؤال مالقيت اله جواب

*╚══════ღღ══════╝

وصلوا عالمشفى ودقات قلب رفاه عم تزيد بكل خطوه وجرحها عم ينزف .. كانت ماشيه عم تستند عالحيط تاره وعلى مالك بيك تاره لحتى وصلت لغرفة وسام وبس شافت عندو نور وقفت بعيد ودخل مالك بسرعه
مالك بلهفه : وسام ابني انت منيح
وسام : انا منيح عمي لاتقلق
مالك : مين عمل فيك هيك
وسام وهو بيطلع بنور : كمال وابنه
مالك بغضب : والله لامحيهم من على وجه الارض
وسام : بس انا وعدت نور ما ائزيهم
مالك : بعدك بتقلي نوووور واطلع بنور بغضب ومسكها من كتافها : لك انتي مابدك تحلي عن ابني بقا مابيكفي اللي عمله ابوكي واخوكي
وسام : عمي نور هيه يلي خلصتني من بين ايديهم
مالك : شو
نور : انا رايحه وسام وياريت ما تنسى وعدك الي
مالك : تعي لهون وعد شو هاد
نور : وسام بيخبرك
مالك : بدي اعرف منك شو بعدك عم تخططي انتي وابوكي
نور : بالازن… . وتركتهم وطلعت لتلقي عيونها بعيون رفاه
رفاه : انتي بنت عمه لوسام
اطلعت فيها نور من فوق لتحت وحكت من بين سنانها
نور : اي انا… واعتقد مهمتك خلصت فيكي تمشي من هون
رفاه : انا بس كنت بدي اطمن ع وسام
نور : وسام ؟؟ بنت الفراش شايله التكلفه… .
نزلت رفاه راسها ونزلت منها دمعه : بعتزر قصدي وسام بيك
نور : اها منيح هيك… وعموما وسام منيح واعتقد اخدتي حقك وزياده فيكي اتفضلي من دون مطرود
حطت رفاه ايدها على جرحها اللي عم ينزف وضغطت عليه
رفاه : بتمنالكم السعاده
وتركتها ومشيت تاركه وراها جرح غميق وقلب مكسور وكرامه انداست بالصرامي
كانت عم تمشي ودموعها بيسبقوها ودقات قلبها عم توجعها
رفاه : انتي مجنونه يارفاه مجنووووونه كيف تسلمي قلبك لواحد حكالك انه بدو يتزوجك ليوصل لحبيبته… الله يلعن هالقلب ويلعن حظي… ليش ياربي انا ليشششش 😭

وبعض الاحلام جمالها بأن تظل أحلاماً ..
وكأنها زوارق ورقيه نهتم بأدق تفاصيلها حين نشكلها ..
ثم لا نملك سوي ان نبتسم لها بينما تبحر بعيداً عنا ..

*╚══════ღღ══════╝
مالك : وسام يلي قوص عليك بيكون ناصر
وسام : بعرف
مالك : بتعرف ؟؟
وسام : في شغلات كتيره عرفتها عمي بس انت كيف عرفت
مالك : اجت لعندي رفاه وخبرتني
وسام بصدمه : رفاه ؟؟
مالك : اي ليكا معي برا اجت لتطمن عليك
وسام : ممكن تناديلا عمي
طلع مالك لينادي لرفاه ومالقيها واقفه مكانها
مالك : غريبه هلأ كانت هون
وسام : وينها
مالك : تركتها واقفه برا ..يمكن رجعت لغرفتها
وسام : هلأ بشوفها
مالك : قبل ماتشوفها احكيلي كل شي صار معك وليش وعدت نور انك ماتئزي هالكلاب
وسام : لأن نور كشفتلي الحقيقه عمي
مالك : الحقيقه !!
وسام : رح خبرك كل شي

*╚══════ღღ══════╝

وصلوا رجال كمال عالمخزن حاملين ناصر يلي كان بعدو غايب عن الوعي وزتوه عند اجرين كامل
كمال : شو عملتو فيه
فريد : مو نحنا معلم… الله وكيلك لقيناه ببيته غايب عن الوعي وجبناه لهون
كمال : صحولي ياه
رشو عليه مي بارده وفز على اربعته وهو يشهق
كمال : صحيت يا افندي
ناصر وهو بيطلع حواليه : كمال بيك ؟؟ انا وين ؟؟
كمال : انت بجهنم الحمره
ناصر : شبك معلم
كز ع اسنانه وحكى بحده : وين وديت وسام
ناصر : ليش وينو وسام مو بالمخزن
مسكو عصام من جاكيته واردف بصوت عالي : لك عم تجدبها ولا مو انت بعتلي رساله انه الشرطه عرفت مطرح وسام ولازم نغير قرنتنا
ناصر : انا ؟؟؟ هالشي ماصار معلم
عصام وهو بيحط الموبايل بوجه ناصر : وهااااد شوووو مو مسج منك
ناصر : الله وكيلك مو انا… . واتزكر يلي صار بينه وبين نور
لحظه لحظه… انا اخر شي بتزكرو اني كنت قاعد مع نور بعد ماعملتلي قهوه وبعدا غبت عن الوعي
كمال بعصبيه : بدك تفهمني انه بنتي يلي هربت وسام
ناصر : ما بعرف بس والله العظيم مو انا يلي بعتت لعصام المسج
كمال : وينا نور
نور : انا هون ابي
اطلع الكل ناح الصوت وشافوا نور واقفه وعم تطلع فيهم نظرة تحدي… قربت بخطوات ثابته وركزت عيونها بعيون ابوها
نور : ليكني بابا
كمال : وين كنتي
نور : كنت مع وسام بالمشفى
كمال : انتيييييي جنيتيي 😡
نور : لا ماجنيت انا تصرفت بعقل
عصام : عقل شو ياخاينه لك انتي دمرتينا كلنا
نور : ما تخاف سيد عصام ماحدا فيكم رح ينئزى
كمال : ليش هربتي وسام
نور : لانه نحنا هدفنا المصاري مو الدم
كمال : وهلأ بعد ماهربتيه حضرتك ماصفى لامصاري ولادم
نور : انت مو بدك مصاري
كمال : ايه
نور : وهاد شيك بخمسه مليون دولار موقع من وسام
كمال : خمسه مليون وكيف قبل وسام
نور : وسام مو ضعيف ولا خاف يواجهكم… وسام قرر ينهي هالخلاف ولو عحسابه
عصام : اكيد هالشيك مضروب
نور : تعوا معي عالبنك لنتأكد
كمال : هاتي الشيك نور
نور : مو قبل ما اخد منكم كلمه بابا
كمال : كلمه بشو
نور : انو ماعاد تتعرضوا لوسام بنوب
كمال : ازا هالشيك مو مضروب انا بوعدك انسى كل الخلاف وشيل وسام من راسي
نور : وانت عصام
عصام : مدام في مصاري يبقى خلص عليه الامان بس شو يضمنا مايروح يشكي للشرطه
نور : اطمن مارح يشكي… . واطلعت بناصر… حتى يلي حاول يقتله مارح يشكي عليه
ناصر : وانتي ليش متأكده كل هلقد
نور : لانه وسيم رجل وعند كلمته
سكت الكل وبلشوا يطلعوا ببعض،
نور : ناطره جوابكم
كمال : انا مافيي ائمن غدر عيلة الخطيب لهيك رح اصرف الشيك واخدكم وسافر برات البلد
نور : ياريت بابا انا ماعاد فيي ابقى هون بعد اللي صار
كمال : موافق عصام
عصام : اكيد ابي
كمال : وانت ناصر
ناصر : بعد مانكشفت قدام وسام مابظن فيي عيش هون لهيك انا معكم
كمال : لكن بالاول بنتأكد من الشيك وبعدا منرتب امور السفر
عصام : يا فررريد صب نخب الانتصار
الكل : هههههههههه
نور بقلبها : الله يحميك ياوسام انا بعدتك عن كل الشرور وحتى البنت يلي تجوزتا. كرمالي .. وبهيك بريت زمتي قدامك وقدام ربي… سامحني على كل شي 😔

*╚══════ღღ══════╝

وسام : وهاد يلي صار عمي انا اشتريت راحة راسي وراسك بالمصاري
مالك : بالك عمك رح يتركنا بحالنا
وسام : هالشي مهمة نور
مالك بشك : يعني شلت نور من راسك
وسام : نور هلأ صارت من الماضي وعلى زمة رجال تاني
مالك : ورفاه
تغيرت معالم وجهو واردف بحزن : طلقتها
مالك : ليش عملت هيك
وسام : لاني تزوجتها لغرض وهي بتعرف هالشي وانا مافيي اجبرها تبقى معي
مالك : بس البنت بتحبك
وسام : بتحبني ؟؟ شو هالحكي عمي مابظن
وقف ومشي ناح الشباك وسرح وهو عم بيراقب الغروب
مالك : لو شفت نظرة الخوف بعيونها وقت اجت لعندي عالمكتب ولا لهفتها عليك كنت عرفت انها بتحبك
وسام : رفاه بنت طيبه واكيد كانت رح تقدم المساعده لاي حدا بيحاجها
التفت عليه وحكا بحزم : طيبه لدرجة انها ترمي حالها عالموت لتنقدك
وسام :………… .

حس مالك انه رفاه البنت المناسبه لوسام ولكنه قرر ما يدخل لحتى يجي وسام ويطلب بنفسه انه يتزوجها

مالك : قوم معي لوصلك عالبيت لحتى ترتاح
وسام : معلش عمي اسبقني وانا لاحقك عندي شغله لازم قضيتها بالاول
مالك بخبث : مافي مأذون بالمشفى بتحب اطلبك واحد
وسام بخجل لانه عمه كشفه : لللشو المأزون عمي
مالك : قلت يمكن بتحب تاخد رأيه بشي… عموما انا سابقك عالبيت بدي شق عالست راويه
وسام : ماشي عمي

*╚══════ღღ══════╝

طلع مالك وبقي وسام لوحدو لتبلش مخيلته تستعرض كل شي صار معه وفجأه لاحت رفاه بمخيلته بشعرها الاسود وعيونها الشهل وابتسامتها العذبه
وسام : انتي من شو مخلوقه رفاه ياترى انتي ملاك على هيئة بشر
اطلع ب ايدو وشاف المحبس وارتسمت على وجهو ابتسامه عذبه
وسام : ياريت عرفتك بغير هالظروف بس شو ماصار انا مارح اتخلا عنك ورح ابقى حدك
قام من مكانه وتوجه لغرفة رفاه ودق عالباب بخفه
وسام : رفاه ممكن ادخل……
ماكان في رد
رجع دق عالباب… . رفاه انتي هون ؟؟… انتي منيحه
كمان مافي رد… . استجمع قوته وعزم يفوت لعندها ويعتزر منها عالشي اللي بدر منه
وسام : رفاه ؟؟
كانت الغرفه فاضيه ورفاه مو موجوده…حس بالخوف عليها وانه ممكن يكون صار معها مضاعفات لانها طلعت من المشفى وراحت لعند عمه… .توجه لقسم الاستعلامات وسأل الممرضه
وسام : لو سمحتي مدام رفاه عبدالله ب اي غرفه هلأ
الممرضه : مدام رفاه تركت المشفى من شوي يابيك
وسام : كيف تركت المشفى والدكتور كيف سمحلا تغادر وهي بهالحاله
الممرضه : المدام وقعت على خروج ع مسؤوليتها وغادرت
غمض عيونو بقهر وحمل حاله وطلع من المشفى يدور عليها
وسام : اكيد مابعدت كتير هيه تعبانه ومافيها تتحرك بسرعه انا لازم لاقيها شو ماكلفني الثمن

*╚══════ღღ══════╝

‎رجعت لبيتها تجر حالها وخيبتها بعد ماتنازلت عن كل شي كتبلا ياه وسام …
دقات قلبها عم تعمل بضلوعها غصه وهي عم تتزكر كلام نور الها وقفت ب انكسار ودقت عالباب
زكيه : مين عالباب
رفاه : هي انا مرت ابي
زكيه : رفاه ؟؟ … شو جابا هي ؟؟
فتحت الباب وشافت رفاه سانده حالها عالباب وايدها معلقه برقبتها ووجها شاحب
زكيه : ولي على امتي شبك ولي شو صايرلك ووينو جوزك
رفاه : …..
زكيه : فوتي لشوف
فاتت رفاه من سكات وتوجهت لغرفتها وسكرت الباب
لميس : مين كان عم يدق امي
زكيه : هي رفاه
لميس : وشو جايبها مو على اساس حكا جوزها ننساها
زكيه : هلأ بعرف شو السيره دفشت الباب وفاتت
… كانت رفاه عم تجمع تيابها وكتبها
زكيه : شو عم تساوي
رفاه : شوفة عينك
زكيه : ليش عم تضبي اغراضك جوزك وينو ردي عليي يامقصوفة الرقبه
رفاه : طلقني
زكيه وهي بتضرب عصدرها : طلقك ؟؟ ولي على طولي ليش طلقك كان طاير عقله فيكي
رفاه : هاد اللي صار مرت ابي
زكيه : اي ينهفى المهم جبتي معك المصاري اللي عطاكي ياهم .. اكيد عم تضبي اغراضك لتروحي عالفيلا اللي سجلها ب اسمك … وينك رفاه انا مرت ابوكي وبمقام امك لااااا يمكن اسمحلك تروحي تسكني لحالك اجري على اجرك ايوا
رفاه : ……
زكيه : اديش حصلتي منه … اكيد هبشتي هبشه محرزه بعرفك شاطره ..
رفاه : …..
زكيه : وينك لاتاخدي تيابك المشرشحه انتي هلأ مليونيريه اي لكن مليون متقدم ومليون متأخر والله وضحكتلك الدنيا ياتقبريني شوفي وجه ربك و اكيد مارح يهون عليكي تتركينا بهالفقر والتعتير ما هيك
رفاه ………
زكيه : اي اكيد عم تحكي لحالك انه وسام بيك عطاني متين الف صدقيني ياروحي بزمتي بديني بعافيتي راوحو سداد ديون ورا المرحوم ابوكي وماصفى معي شي،
رفاه : …….
زكيه : اممم خليني روح جهز حالي لاجي معك مسسستحيل اتركك تروحي لوحدك ياضي عيني شيه انتي متل بنتي .. يالميسسس
رفاه : انا طالعه من هون لادور شغل مرت ابي
زكيه : وشو لازمته الشغل بعد ماصرتي مليونيريه
رفاه : انا تنازلت لوسام بكل شي
زكيه : شوووووووو الله لا يوفقك اللهي اعدمك ولحقك باللي خلفك وليش تنازلتي ياحماره ياوجه الفقر‎
رفاه : ممكن تتركيني اضب اغراضي وروح
زكيه : تروح روحك وتفتح جروحك لك تضربي بالراس المتيس انقلعي من بيتي مابدي المحك بنوب انا مو ناقصني اصرف ع وحده مطلقه ابصر ليش جوزا طلقها بعد يومين زواج… . اكيد معيوبه ولا فيكي شي ياوسخه ياترباية ابتسام
رفاه : خلص مرت ابي انا رايحه ومافي داعي تهكلي همي او تداخلي فيي
زكيه : ان شاء الله بيدخل فيكي الحكيم ومابعرفلك دوا ياحق لك عازك وعوازك والف رقعه بأمبازك قال البسقه شافت بنتها عالحيط آلت تؤبريني متل اللوليه بالحيط روحي اسألي عن امك وصيتها بالحاره يلي ياكل من بيتها الجردان والصرصور والفاره
طلت لميس راسها من شق الباب : شو في امي
زكيه : الخانوم اطلقت لك اللهي يارفاه ينكت كرارك ويشعل نارك ويشوفك الحكيم ومايعرفلك دوا
لميس بفرحه : هههههه توقعت انه تزوجها تسلايه اي خرجك الله لايقيمك
زكيه : الغبيه بدل ماتهبش منه هبشه مرتبه تنشلنا من هالفقر متنازله للبيك عن كل حقوقها
لميس : ابصر شو شايف عليها واخد منها كل شي انتي صدقتي انه هي يلي متنازله
زكيه : الله يعدمني ياكي يارفاه جبتيلنا العار والفضيحه اللهي تآكل جنابك الفرش ويحكموك عشره طرش ومايلائولك دواره… اللهي يخطفك عزرائيل ويكبسك بالبرميل يابنت غسالة الاواعي على نهر طوره
تركتهم وطلعت ودمعتها بطرف خدها وهي سامعه زكيه عم تسبا وسكرت الباب وراها بقوه
زكيه : لك اللهي يبعتلك 12 سوا نار وبارود وهوا صياح ونياح وغز رماح وعما وفالج وكرساح وفئرودين وغضب الوالدين يامئطعة العينتين يارفاه يابنت ابتسام

*╚══════ღღ══════╝

عروس للايجار بقلم امل احمد سلوم الجزء الأول

عروس للايجار بقلم امل احمد سلوم الجزء الثاني

عروس للايجار بقلم امل احمد سلوم الجزء الثالث

عروس للايجار بقلم امل احمد سلوم الجزء الرابع

عروس للايجار بقلم امل احمد سلوم الجزء الخامس

عروس للايجار بقلم امل احمد سلوم الجزء السادس

عروس للايجار بقلم امل احمد سلوم الجزء السابع

عروس للايجار بقلم امل احمد سلوم الجزء الثامن والأخير

 

admin

اترك تعليقاً

لن يتم نشر عنوان بريدك الإلكتروني.

error: Content is protected !!