#لاني_امرأة_بقلم_هلا_غرابلي#الجزء الأول

#لاني_امرأة_بقلم_هلا_غرابلي#الجزء الأول

 

لا شيئ الذ من ان تكوني بطلة نفسك ،ان تهزمي انكسار روحك و عجزك الذي اطعموك اياه مع الحليب ،ان تملئي نقصك الذي صار جزء من عقيدة معطوبة ، ان تمضي في هذه الحياة امرأة شجاعة ،تعرف ماذا تريد ،و تعرف تماما كيف تحصل عليه

امرأة كهذه يهابها الجبناء من الرجال و تغار منها الفارغات …(مقتبس) ختام …هيك اسمي ،اتسميت هالاسم لانو كنت البنت الخامسة لاهلي يلي تأملو كون خاتمة البنات ، و على امل يكون وجهي حلو علين و يجي بعدي الصبي المنتظر ، و فعلا كنت الخاتمة ،كنت الخاتمة بخلفة امي من ابي لانو ابي ما نطر و تزوج عليها ،تزوج مرة جابتلو الصبي و ما جابتلو غيرو ، كبرت و ما عشت طفولة طبيعية متل اي بنت بعمري

كنت دائما حس حالي درجة تانية و انسانة ناقصة لاني بنت و لانو ابي و امي حسسوني بهالنقص حتى امي كانت تندب حظا و تقول عن حالا انو هي مرة ما نافعة لانو كل خلفتا بنات و ما قدرت تجيب صبي واحد و كانو الموضوع بايدها ،اما ابي كنا نشوفو يومين بالاسبوع و الباقي يقضيه عند مرته التانية و ابنه يلي كان شايفه و ما مصدق و كأنو ما خلف غيرو و كانو نحن البنات ما كنا ارواح …

ما كنا بني ادمين.. كنا اجساد خالية من المشاعر و الاحاسيس …كنا مجرد ارقام …ارقام اجت بالغلط على هالدنيا ،كنت شوفو احيانا ماشي و حامل ابنو على ضهرو و متباهي فيه ،و كانو عم يقول للناس شوفو انا صار عندي صبي ، انا هلأ صرت رجال ، انا ما بقا ابو البنات ،كان يمر جنبي و كانو انا سلة زبالة بالشارع او قطعة خردى و انا اصلا كنت حس حالي هيك لانو على طول تيابي مهترية و مخزقة ، يقلي وليه روح انقلعي لجوا ما بدي شوفك برا البيت انت بنت و البنات لازم يضلو بالبيت و ما يطلعو ،كنت اركض لجوا و روح عند امي و قلا شفت ابي ماسك رامي ،ليش ما بيحبنا متل ما بحبو ،ليش ما بلبسنا متل ما بلبسو و بياخدنا مشاوير متلو …بشو نحن منختلف عنو …

نحن اولادو كمان..،كانت امي تقلي لانو صبي و انت بنت ،وعيت على الدنيا بفكرة وحدة بس اني انا بنت، يعني انا ولاشي ،يعني انا عايشة على هامش هالدنيا ، و

ما عندي طموح بهالحياة اكتر من انو اكبر و اتزوج و جيب صبيان حتى زوجي يحبني و مجتمعي يتقبلني و الحياة ترضى علي ،هيدا كل شي بقدر اعملو لكوني انخلقت بنت ….

كبرت و صرت صبية و تزوجو كل اخواتي البنات و اجا الدور علي ،تقدملي شب اسمو رامز كان بيشتغل مبلط و كان فقير كتير و رح يسكني ببيت اهلو لانو ما عندو بيت و ما عندو قدرة يشتري بيت او حتى يستأجر و ما كان عندي خيار وافق او ارفض متل بقية البنات ،ابي قرر و وافق عني لانو البنت ما عندا رأي ابدا و لازم تنفذ على الساكت بدون ما تعترض و متلي متل بقية اخواتي كلن تزوجو بدون ما يكون عندن حرية اختيار و من اول عريس ابي وافق فورا ،كنا متل الهم على قلبه و بدو يخلص مننا و من مصروفنا يلي كان يصرفه علينا على الفاضي متل ما كان يقول ،اما امي ما كان عندا رأي ابدا لانو ابي مسحلا شخصيتا على الاخير و الرأي رأيه و بس ….

#لاني_امرأة_بقلم_هلا_غرابلي#الجزء الأول

تزوجت رامز و انتقلت للسكن معه و مع امه و اخوه يلي كان اصغر منه بسنتين و بيدرس جامعة ، كان بيتن صالون و غرفة نوم لحماتي و غرفة نوم لسامر اخوه لرامز و غرفة نوم الي و الحمام و المطبخ مشترك ،كانت الحياة صعبة ببيت مشترك لانو كنت وقت بدي فوت على التواليت بالليل اكل هم لانو مرتين صدفت سامر طالع منه و بس شوفو اخجل كتير و تابع على المطبخ و اعمل حالي بدي اشرب مي و احيانا يجي من جامعته و كون بالمطبخ عم اجلي ،و وقت خلص افتل ضهري و شوفو بوجهي عم يطلع علي

بعد شهرين من زواجي بلشت نظراته الي تخوفني و حسا عم تحاصرني بمكاني و كانو ما في مهرب منو ،كان يفتح معي مواضيع كتير و انا رد عليه باختصار لانو كنت ما ارتحلو ابدا و على طول اخدة حذري منه ،و بحكم انو زوجي طول نهارو بشغلو كنت حب التزم بغرفتي بس خلص شغلي بس حماتي كانت ما تخليني كمل ساعتين و انا قاعدة لحالي ،تناديلي و تقلي تعي اقعدي معي و مع سلفك ،سلفي يلي بلش يتجرأ علي و عمل اول حركة وقحة معي وقت كنت عم اجلي و اجى من وراي و قرصني من خصري ،فتلت ضهري و طلعت فيه و قلتلو فكرتك رامز

قلي رامز شو بدو يجيبو بهالوقت ،مو حرام تارك هالقمر طول نهار و ما بيجي لاخر الليل ،قلتلو الله يعينه عم يشتغل انا عاذرته ،قلي بتحبيه ؟،قلتلو طبعا هيدا زوجي و بحبو ،قلي هو بحبك؟ ،قلتلو اي بحبني ،قلي بس ما بحبك اكتر مني ، سكتت ما عرفت شو بدي رد تركت الجلي فورا و رحت على غرفتي و انا خايفة و متوترة ،شو حكى معي هيدا المجنون، ما بقا لازم ضل بهالبيت بعد يلي سمعتو

بس يجي رامز رح قلو انا بدي يستأجرلي بيت لحالي ،و وقت اجا رامز المسا من شغلو خبرتو اني انا ما بقا مرتاحة بهالبيت بدي نطلع ناخد بيت لحالنا حتى لو غرفة وحدة بس و منتفعات ،عصب علي و قلي انت بتعرفي انو ما معي لاستاجر بيت و هالموضوع ما بقا تفتحيه معي مرة تانية….

تابعنا على التلجرام 

اقرأ عن مال الشام

mal alsham

اترك تعليقاً

لن يتم نشر عنوان بريدك الإلكتروني.

error: Content is protected !!