لحمة#الفقراء#القسم الثالث للكاتبة أمل أحمد سلوم

لحمة#الفقراء#القسم الثالث للكاتبة أمل أحمد سلوم

لحمة#الفقراء#القسم الثالث للكاتبة أمل أحمد سلوم

رواية لحمة الفقراء للكاتبة امل احمد سلوم
رواية لحمة الفقراء

وببيت عبدالله…
واقفه مياسه بحد الباب وكل شوي بطل براسها لتراقب الرايح والجاي

مياسه : هففففف وينو هاد كتير طول ابي حكى انه دفعلن مصاري ورح يلحقوه بالخروف دغري

بقيت واقفه حصه على الباب وبعد دقايق طلعت بنت الجيران لتكب الزباله وشافت مياسه واقفه عالباب

جميله : شو ست مياسه لشو واقفه عالباب مالك بالعاده
مياسه : مافي شي بس ناطره ابي تعي سليني شوي رح يطق قلبي وانا استنى
جميله : اي تكه لحط عراسي وجايه لعندك

بعد مارجعت جميله لعند مياسه وقفوا التنتين وبلشوا ياخدوا ويعطوا بالكلام ومياسه كل شوي تضرب عينها ناح اول الطريق

جميله : ولي مياسه شو قصتك اليوم عيونك عم يلعبوا هون وهون لتكوني مو ناطره ابوكي ومخبيه عني شي
مياسه : لا يو شو هالحكي بس ابي مسكين بيرجع تعبان كتير فحبيت لاقيه لاساعده بحمل الاغراض
زمت جميله شفايفها بعدم تصديق وبقيت تطلع لاول الطريق
جميله بقلبها ( بقص ايدي ازا كنتي ناطره ابوكي اكيد الشغله فيها ان…  والله وطلعتي مو قليله يامياسه )

طالعها من شرودها صوت مياسه
مياسه : لك جميله وين سرحتي
جميله : اه…  معك معك
مياسه : عم يأذن الضهر خلينا نصلي ونرجع نكفي حديثنا
جميله : اه…  اي روحي انتي صلي انا لسه بدي اتوضا
مياسه : طيب ماشي لكن بصلي وبرجعلك
جميله : اي تمام ياروحي

فاتت مياسه لجوا بينما جميله بقيت مكانها تراقب بعد ماتسلل الشك لقلبها
جميله : بتفكرني غبيه بدا ياني فوت لجوا والله اعلم بمين ناويه تلتقي ياعيب الشوم بس احسن شي وقف ناح باب بيتي واراقب وامسكها بالجرم المشهود

بعدت جميله بسرعه ووقفت عند باب بيتها وبقيت تروح بعيونها هون وهون
ومن بعيد طل شب ومعه خروف عم يسحبه ..
سائد : ازا الله ماخيبني هي هيه الحاره ياترى انو بيت هوي بيت ابو علي !!! مو ع اساس بنته ناطره عالباب !!!
جال بحجر عينه ولمح بنت واقفه عالباب .. ابتسم وسحب الخروف وتوجه لعندها
سائد : يعطيكي العافيه اختي
جميله : اهلين .. خير شو بتريد
سائد : هي الاضحيه اشتراها الوالد اليوم من سوق الحلال وطلب مني وصلها عالبيت
توسعوا عيون جميله ولمعوا بفرحه
جميله : عنجد !! هاد الخروف النا…  لك الله مايحرمنا منك يابيي
سائد : انا سلمتك الخروف بالايد بلغي سلامي للوالد…  خاطرم اختي
جميله : الله معك اخي مهونه

بهاللحظه طلعت مياسه من بيتها وشافت جميله عم تعانق الخروف وتنده لامها بصوتها الحاد
جميله : امي يا امي ابي جابلنا اضحيه… .. تعا ياخروفي تعا اكيد جوعان

سحبته لجوا وعيون مياسه بتراقبها بحب

مياسه : الهيئه جيرانا كمان جايبين اضحيه…  ايييه الله يفرح كل الناس

قرب العصر وماكان هالخروف يشرف

بهالكلمات كانت مياسه عم تعبر عن اسيائها وضجرها وفجأه لمحت امها واخوها علي جايين عالبيت

علي : ليش واقفه عالباب !!
مياسه : ناطره السيد خروف يشرف
دانا : لسه ماحدا جابو
هزت مياسه راسها بالنفي .. بينما سمعت دانا صوت خروف قريب منهم…
دانا : سامعه صوت خروف اكيد هوي
مياسه : لا امي هاد خروف بيت الجيران من شوي جابو
دانا : ايوه الله يتقبل نشالله لكن فوتي لجوا لنحظر الفطور وانت ابني ابقى هون
علي : فوتوا انتو امي انا بدي اخطف اجري لعند ابي افهم منه شو القصه
دانا : بتعمل زينة العقل امي

*╚══════ღღ══════╝

لحمة#الفقراء#القسم الثالث للكاتبة أمل أحمد سلوم

وصل علي عالمزرعه يلي بيشتغل فيها ابوه مرابعي وركض لعندو
علي : ابيي ابيي
عبدالله (تلفت وانتابه الخوف)
شوفي ابني حدا صرلو شي امك واختك مناح
علي ( وهو حاطط ايدو على صدرو وعم يلهت ) ماتخاف ابي الكل بخير بس جيت اسألك عن الاضحيه
ضيق عبدالله عيونو وهمس بتساؤل : الاضحيه !!! شبها !!
علي : ماحدا جابها لحد هي الساعه ابي
عبدالله : كيف هيك !! انا دفعت حقها لابو معاذ على دوز باره وطلبت منه يخلي شغيله يوصلها عالبيت وهو اكدلي انه رح يبعتها معه
علي : والله يابي هاد يلي صار
نزل عبدالله عن زنودو ..وامر علي يلحقه
عبدالله : تعال معي
علي : لوين !!
عبدالله : بدي غير تيابي وروح لعند ابو معاذ افهم منه شو السيره ماظل معنا وقت نسيان بعد بكرا العيد

*╚══════ღღ══════╝*

وبالسرايا .. كانت منال مشغوله بتجهيز التحضيرات لاستقبال حماتها وسلفها من الحج
محمد : يعطيكي العافيه حبيبتي شو وين البنات ليش عم تشتغلي وحدك
منال (تبسمت)  بصراحه عطيتن اجازه خطي بكره وقفة عرفات خليهم يجهزو للعيد ويعزلوا بيوتهم
محمد : الله يرضى عليكي شو بنت اصل بس لو خليتي عندك مياسه لتساعدك
منال : هي بنتي روان بتساعدني ماحبيت اعطي لكل الخادمات اجازه وهي لا
محمد : هيه مارح تزعل وقت تعرف انك طالبتيها بالاسم وبعدين هي فرصه تفقديها بشي لبسه للعيد ولا شو رأيك
منال : اي والله فكره خصوصي انه هالبنت باين عليها معتره وكتير درويشه ورح تنبسط بالتياب الجديده خير الله
محمد : لكن وانا رايح لعند الاغا بمرق لبيت العم عبدالله وبطلب منه يخبر مياسه تجي عالسرايا بكره
منال : ان شالله ابن عمي

*╚══════ღღ══════╝*

لحمة#الفقراء#القسم الثالث للكاتبة أمل أحمد سلوم

وصل عبدالله لعند ابو معاذ بخطوات سريعه وفات بعجل عطرش الغنم وهو بينده بصوت جهوري على ابو معاذ
عبدالله : ابو معاااذ وينك
ابو معاذ : ليكني هون خير اخي ابو علي شو في ليكون الكبش ماعجبك بس صار ببيتك
عبدالله : لك الاضحيه ماوصلت لبيتي لهي اللحظه
ابو معاذ (بصدمه) : شو هالحكي يا ابو علي انا بنفسي اكدت على شغيلي وهو اكدلي انه وصلها لباب بيتك وبالاماره المحروسه بنتك استلمته
علي : وينو شغيلك !!
ابو معاذ : هلأ بناديلو…  ساااائد ياسائد
اجا سائد يهرول…  نعم معلم
ابو معاذ : الاضحيه يلي طلبت منك توصلها لعند عمك ابو علي وينها
سائد : شو وينها ما انا وصلتا لبيته وبالاماره اخدتها مني صبيه كانت واقفه عالباب
ابو معاذ : تأكدت من كلامي ابو علي

حس عبدالله بالحيره وانه في غلط بالموضوع وقبل مايستعجل بقراره اخد درب طريقه ورجع عالبيت على امل يكون الشغيل وصل الاضحيه بعد ما طلع علي من البيت ولهيك ماشافوا

عبدالله : دااانا مياااسه وينكم
طلعوا دانا ومياسه من المطبخ
دانا : شفت صاحبك شو عمل فينا يا ابن عمي لازم تروح تشكي عليه
عبدالله : طولي بالك يابنت الحلال لافهم القصه
دانا : القصه واضحه متل عين الشمس وصاحبك طمع بالمصاري وحكا لحالو بكزب هالكزبه وبدحك على هالدرويش لانه عارف مالنا سند
قعد عبدالله عالارض وغمر راسه بين ايديه
عبدالله : لك ماعم افهم شي .. الرجال والشغيل تبعوا اكدولي انن بعتوا الاضحيه لباب البيت وبنتك بنفسها استلمتها
علي : بس وقت رجعت انا وامي عالبيت كانت مياسه بعدها ناطره عالباب ماهيك اختي
هزت مياسه راسها بالايجاب وكانت ع وشك تحكي واستوقفها صوت خروف الجيران…  سكتت شوي وبعدين دارتلا القصه
مياسه : لك العمااااااا
حكت كلمتها وهي بتضرب ع جبينها والصدمه واضحه عليها ليلتفت عليها اهلها ويقوم عبدالله ويسألها بلهفه
عبدالله : تزكرتي شي بنتي
مياسه : اليوم كنت واقفه مع جميله  بنت الجيران وفتت لاصلي الضهر وبس طلعت تفاجأت بشب واقف معها وعم يعطيها خروف وبيقلا ابوكي بعته وهي دخلته عالبيت وهي مبسوطه…
قعدت عالارض وضربت كف بكف…  لك كيف هيك صاار كيف ماانتبهت
عبدالله : يعني جميله فكرت انه ابوها يلي بعت الاضحيه
مياسه : اي
دانا : هلأ هلأ بدك تروح لعندن وترجعها
علي : اي ابي لازم ترجعها وازا بدهن شهود ليكو ابو معاذ وشغيله شةبيشهدو انه الخروف النا
احتار عبدالله ب امره وبعد الحاح من مرته وولادو قرر يروح يفهم جارو اللبس يلي صار
وقف عالباب بتوتر ودق دقه خفيفه وبعد ثواني فتحله جاره وهو راسم ابتسامه عريضه على وجهو
ابو جميله : اهلين وسهلين بجاري وحبيبي ابو معاذ تفضل تفضل
عبدالله بحرج : غير مره اخي .. رح يأذن المغرب وبدي افطر مع عيالي بس جيت اسألك سؤال
ابو جميله : تفضل لعيناك
عبدالله (بلبكه)  بصراحه هو يعني اليوم
استوقفه صوت الخروف وبعدا ضحك ابو جميله بفرح
عبدالله : شو جبت اضحيه !!
ابو جميله : ههههه لاوالله مو انا يلي جبته اساسا من ويلي بس اهل الخير بعتولي ياه هديه ويلي وصلو حكا لعيلتي انه انا جبته لحتى مايروح عليه الاجر…  ااااخ ياخيي عبدالله روح الله يبعتلك ابن حلال متل مابعتلي وفرح ولادي على وجه هالعيد
ابتسم عبدالله بدفا وحكا بصوت هادي…  مبارك عليك اخي .. والله يتقبل منك
ابو جميله : اجمعين يارب…  اي صحيح شو كنت بدك تسأل
عبدالله : اه… تصدق نسيت ههههه يالله بس اتزكر برجعلك خاطرك اخي
ابو جميله : الله معك ياطيب

يتبع في القسم الرابع ….

تابع في المقال السابق لحمة الفقراء القسم الثاني

mal alsham

رأيان حول “لحمة#الفقراء#القسم الثالث للكاتبة أمل أحمد سلوم

اترك تعليقاً

لن يتم نشر عنوان بريدك الإلكتروني.

error: Content is protected !!