لحمة الفقراء

لحمة الفقراء

لحمة الفقراء القسم الأول للكاتبة امل احمد سلوم

رواية لحمة الفقراء للكاتبة امل احمد سلوم
رواية لحمة الفقراء

بضيعه صغيره بيتصفوا اهلها بالبساطه والطيبه كان في عيله مستوره مكونه من اب وام وبنت وصبي
هالعيله رغم فقرها واحتياجها لكن كانت عزة نفس مالها حد بيتصفوا بالكرامه والاباء قدام اي شخص بيحاول يمس كرامتهم او يخدش كبريائهم
مياسه : علي ياعلي عم تسمع التكبيرات
حكت مياسه جملتها وهي عم تدفع الباب المتهاوي ب ايديها الناعمه وابتسامتها الصافيه معبيه وجهها ليرد عليها اخوها بنفس اللهفه
علي : الله اكبر الله اكبر سامع اختي سامع
مياسه : يا الله شو بحب صوت التكبيرات بحس براحه نفسيه
علي : اكيد اختي مافي احلا من صوت الاذان والتكبيرات…  يالله تعي لنفطر مع امي وابي
زمت مياسه شفايفها الورديه وهزت كتافها بحركه طفوليه وتمسكت بحديد الشباك اكتر …  مابدي .. بدي ابقى اسمع صوت التكبيرات
علي : يلي بيسمعك بيحكي مارح تسمعيها اختي .. بيتنا صغير واي صوت بنسمعه .. بعدين احلا شي تكوني قاعده عالسفره وصوت التكبيرات بيصدح حواليكي
اقتنعت مياسه بكلام اخوها ورسمت ابتسامه عريضه وحللت ايديها عن سياج الشباك ومشت معه للغرفه التانيه
كان عبدالله (والدهم)  قاعد عالفرشه عم يسبح وباين على معالم  وجهوا الهدوء والسكينه .. كل شي فيه عم يبتسم
مياسه : يسعد مساك ابي
رفع عبدالله بصره وهتف بحب .. مسا الورد ابي يالله ساعدي امك بتجهيز الفطور
مياسه : حتى ونحنا صايمين لازم  ناكل عدس مشتهيه اكل لحمه وخضره
تغيرت معالم الاب ومالت للعبوس بينما نكش علي اخته لتنتبه على غلطها
مياسه (بحرج)  اسفه ابي ماقصدت
عبدالله : اعتزري لرب العالمين مو الي ابي .. العدس نعمه من نعم الله وسبحانه اللي وهب للفقراء لحمه بسعر رخيص .. يمكن تختلف بالطعم لكنها بتحتوي على نفس الفايده والعناصر المكمله بس الفرق انه العدس افيد من اللحمه
مياسه : كيف هيك مافي وجه مقارنه بين اللحمه والعدس
نزل عبدالله المسحبه من ايدو وتربع وهو بينده لمرته لتجي تسعفه من اسألة بنته اللي مابتنتهي
عبدالله : دانا يادانا .. تعي يا ام علي الحقيني من السان بنتك
مياسه : هيك ابي يعني انا الساني طويل
علي : طويل وبدو قص
مياسه : لا مو طويل
علي : لا طويل
فاتت دانا وهي حامله صينية الاكل وهتفت بجديه
حاج مناقره انت وياها مو سامعين اذان المغرب تعوا كلو لقمه قبل مايبرد الاكل
مياسه : ع اساس رح تفوتنا وليمه كل يوم مناكل عدس
دانا : بنت !!
مياسه : كلكم عليي 😭😭
عبدالله : قربي وسمي بسم •اللّـہ̣̥ بنتي وبعد الفطور منحكي

اجتمعت العيله على سفرة الاكل وبلشوا ياكلوا ويتحاذبوا اطراف الحديث .. كانت لمتهم كفيله تنسيهم اي تعب وعنا وبحبهم لبعض بيقدرو يتخطوا اي حاجز مهما كان صعب

عبدالله : الحمد للہ اللهم دمها نعمه واحفظها من الزوال يارب
الكل : آمييين
انشال الفطور وفاتت ولاء مع امها ترتب معها المطبخ وتساعدها ب اعداد الشاي
دانا : يالله تعوا اشطفوا تمكم بهالدمعه
عبدالله : اي والله مافي اطيب من كاسة الشاي بعد فطور دسم
مياسه: 😶
التفت الاب الحكيم ناح بنته واشرلا تجي تقعد حده
عبدالله : بتعرفي انه العدس اسمه لحمة الفقراء
مياسه : طبعا بعرف
عبدالله : وياترى ليش سموه هيك
مياسه : لانه ماحدا بياكله الا الفقراء
ضحك عبدالله وعليت قهقهاته وبعدا  مسك حفنة عدس بقبضته
عبدالله : العدس يابي بيحتوي على بروتينات ومعادن موجوده باللحمه بس الفرق بين اللحمه والعدس انه العدس مابيعمل امراض متل اللحمه
مياسه : امبلا بيتفخ
عبدالله : وياترى مين ارخص كاسة كمون ولا ادويه للنقرص والكليسترول
مياسه : شو يعني نقرص !!
عبدالله : النقرص مرص بيصيب الناس يلي بيتناولوا لحمه بكميات كبيره ..طبعا مو بوجبه وحده انا بقصد عالمدى البعيد…  وهالمرض  متعارف عليه طبيا بأسم داء الملوك
مياسه : يعني مابيصيب الا الملوك
عبدالله : المرض متل الموت ابي مابيعرف كبير وصغير غني او فقير بس سموه بهالاسم لانه المعترين مافيهم ياكلو لحمه كتير وانتسب للملوك
مياسه : ماكنت بعرف انه اكل اللحمه مضر
عبدالله : ابدا مو مضر انما الاكثار منها مضر لانها بتحتوي على نسبه كبيره من الدهنيات والالياف اللي مابتنهضم فبتبقى الدهنيات متكدسه بجسم الانسان بينما الالياف بــ…
قاطعه علي وهو فايت بسرعه
علي : ابي ابو معاذ عالباب بدو ياك ضروري
عبدالله : يالله ابي جاي

قام عبدالله وبقيت مياسه تلعب بخصلة شعرها وتفكر بكلام ابوها
مياسه : اي كيف يعني اللحمه بتعمل امراض ليكو الاغا صحته متل البغل وكرشو قدامه مترين وكل يوم بياكل لحمه…  الضاهر ابي حكى هالمقدمه ليفهمني انه بالعيد مافي لحمه 😭 اوووف ليش هيك حياتي ليشش شو زنبو كرشي الصغير يتحمل الفقر والتعتير 😭

*╚══════ღღ══════╝

طلع عبدالله ليشوف ابو معاذ وكان باين عليه الفرحه
عبدالله : اهلين اخي ابو معاذ تفضل
ابو معاذ : تسلم اخي ابو علي غير مره بس جيت قلك انه الكبش يلي طلبته رح ينباع ازا مادفعت باقي تمنه…  لاتواخزني اخي والله لو الطرش ل الي ماكنت سألت وتركتك براحتك
نكس عبدالله راسه وهو بيهزو يمين وشمال…  لاحول ولاقوة إلا بالله .. طيب في مجال تصبر عليي بس يومين
ابو معاذ : لعيونك اخي اعتبره صار بس الله يخليك لاتحرجني مع صاحب الطرش رح امهلك يومين مو اكتر
عبدالله : بارك الله فيك

كانت خيبة الامل واضحه علـّۓ وجه عبدالله وبنفس الوقت ماحب يشعر ولادو بشي…  طول السنه كان يصمد القرش عالقرش لحتى يقدر يجيب اضحية العيد ويفوت الفرحه علـّۓ قلوبهم
دانا : شبك ابن عمي
عبدالله (بهمس)  مافي شي
دانا : يوه انا غشيمه عنك ..فشلي قلبك وخبرني شو وجعك ياضي عيني
عبدالله ب الم : كنت عم حوش حق اضحيه بس مو قادر كفي باقيها وصاحب الطرش حكى لشغيله ازا مادفعت الباقي رح يرجع مصرياتي ويبيع الكبش
دانا : وكل الله ابن عمي لسه اليوم واحد ذو الحجه ومن شغلي وشغلك وشغل علي رح نكفي تمن الاضحيه
عبدالله : الله كريم يا ام علي…

*╚══════ღღ══════╝

تاني نهار وتحديدا بقصر الاغا كان عبدالله واقف ومتلبك اجر بتقدم واجر بتأخر واخيرا عقد النيه ومشي ب اتجاه الاغا
عبدالله : السلام عليكم يابيك
الاغا : اهلين عبدالله خير شو بدك
عبدالله بحرج : كنت بدي احكي معك بموضوع ازا سمحتلي
الاغا (بتأفف) شو في فوت بالموضوع مو شايفني مشغول وعندي ضيوف
قرب عبدالله من الاغا وحكا بهمس
انا بدي اخد سلفه  علـّۓ راتبي
تلفت الاغا ناح عبدالله بطرف عينه…  ولشو السلفه !!
عبدالله (ابتسم)  و •اللّـہ̣̥ يابيك حابب جيب اضحيه
بلش الاغا يضحك بصوت عالي ويقهقه وعبدالله واقف قدامه وعيونه على بطنه يلي عم يهتز بقوه قدامه
الاغا : بدك اتضحي قلتلي اي لاتكلف حالك ووفرك قرشك لبيتك وعيالك شو نسيان اني كل عيد بدبح عشرين عجل وبوزعن عالفقرا والمعترين وانت واحد منن هههههه
عبدالله : الله يديم عليك الخير يابيك بس انا حابب هالسنه اضحي لوجه الله تعالى ودفع بلى عني وعن عيلتي
الاغا : شي حلو والله مو ظايل بالخم الا ممعوط الدنب بدك العالم ياكلو وجهي ويحكوا الاغا سلمان مامعوا مصاري يضحي وشغيله عم يضحي
عبدالله : العفو يابيك العين مابتعلا عن الحاجب بس…
رفع الاغا ايدو ليسكت عبدالله
الاغا : بدون بس سلف ماعندي بدك اتضحي روح شوفلك حدا يعطيك هه
نزل عبدالله راسه والغصه بقلبه وتحرك م̷ـــِْن قدام الاغا وهو مكسور الخاطر

كان الضيف يلي عند الاغا عم يتابع حوارهم عالسكت وحس بوجع عبدالله وكسرت خاطره…
محمد : ليش ماعطيتوا سلفه خطي خليه يفرح هو وعياله ع وجه العيد
الاغا : لك هاد واحد بلهموطي ال شو بدو يضحي عحسابي يروح يدورلوا عشي واحد مغفل يعطيه

شد محمد  علـّۓ قبضته بقهر وقام من مكانه
الاغا : لوين !!
محمد : تزكرت شغله بعدين بجي لعندك
الاغا : اي بس ماتنسى تجي عالفطور اليوم عاملين خروف محشي
محمد : ان شاء الله..  سلام

مشي محمد بخطوات سريعة ليلحق عبدالله
محمد : يا اخ لو سمحت
عبدالله (تلفت عليه)  نعم يابيك ائمرني
محمد (وهو بيمد ايدو لجيبته : بصراحه انا كنت عند الاغا وسمعت حديثكم و بتمنى…
عبدالله (بعجل)  لو سمحت يابيك انا ماعم بطلب صدقه رجع مصرياتك لجيبتك
محمد : له يارجل ليش حسبتها هيك هدول هديه مني لاخي الكبير والرسول عليه الصلاة والسلام قبل الهديه
عبدالله : عليه الصلاة والسلام…  معلش يابيك مافيي اقبلهم منك لاتواخزني…  عن ازنك
محمد : لحظه لحظه
عبدالله : نعم
محمد : طيب شو رأيك تجي تشتغل عندي بعد ماتخلص شغلك عند الاغا وبهيك بتمجع المصاري يلي بدك ياها بتعبك وعرق جبينك
حك عبدالله دقنه بتفكير وبعدا حكا…  وشو رح اشتغل عند حضرتك بلا زغره
محمد : عندي ارض صغيره قدام البيت وبدها تعزيل وبصراحه مو فاضي عزلها شو رأيك تعزلها انت وتاخد تعبك على دوز باره وبهيك بتكون منيتي على حالي
عبدالله : بس انا بظل للمغرب عند الاغا ومارح لحق اجي لعندك
محمد : ياسيدي ابعت ابنك مرتك اي حدا .. الارض متل ماقلتلك صغيره وهي حاكوره بحد بيتي ومو بحاجة جهد كبير
عبدالله : ابني ومرتي بيشتغلوا ومافي غير بنتي لهيك بعتزر منك…
محمد : اديش عمرها المحروسه بنتك
عبدالله : 18 سنه
محمد : طيب يا اخي ابعتها لعندي ولاتخاف عليها البيت مليان ورح تكون بحماية الله وحمايتي
عبدالله : بشوف عيلتي وبردلك خبر يابيك
محمد : وانا ناطرك اخي عبدالله وبلاها هي بيك كلنا ولاد تسعه

يتبع …… في القسم الثاني

تابع في المقال التالي

mal alsham

لا تعليقات بعد على “لحمة الفقراء

اترك تعليقاً

لن يتم نشر عنوان بريدك الإلكتروني.

error: Content is protected !!