المصيدة بقلم مال الشام

المصيدة بقلم مال الشام

#المصيدة بقلم مال الشام

المصيدة بقلم مال الشام

احمد: مروحة حاجه بكي الي بشوفك مفكرني مهاجر، كلهن سنتين و راجع
مرح: بالله؟ و عم تقولها هيك ببساطة سنتين زمان!! … تضرب رح اشتئلك
احمد: بعدك مصرة ما تجي تودعيني بالمطار؟



مرح: كان نفسي اجي بس اختك دلال رايحه معكن و ما بدي اتواجه معها و ننفضح بالمطار… خلص رح ودعك للباب و انت بتحكي معي قبل ما تطلع بالطيارة… يلا بلا ما تتاخر
مسك ايدها و باسها و قلها انتبهي ع حالك مابدي وصيكي
مرح: ان شاء الله حبيبي الله ييسرلك…
حمل شنتايتو و طلع… وقفت ع باب البيت و ودعتو… لحتى غاب عن عينها ، سكرت الباب و فاتت ع غرفتها و صارت تبكي…
قبل ما تطلع طيارتو اتصل عليها وقلها: فراقك صعب كتير علي بس النا 3 سنين متجوزين و حالتنا متل ما هي، صار لازم اعمل شي ليتحسن وضعنا و نقدر نجيب ولد يملي علينا حياتنا…الله. يحميكي و رح اشتقلك..
مرح كانت عم تفكر و شايفه انو معو حق… تنين موظفين و بيشتغلو بي ليلحقو اجار البيت!
ما صار لازم ترتاح من هالشقى و تتستت بيتها متل كل هالنسوان!
#بعد_مرور_اربع_اشهر
كانت مرح بدوامها و عم تشتغل لما اجاها اتصال من رفيقتها هبة..
مرح: الو هبوش كيفك
هبة: تمام يا البي كيفك انتي؟
مرح: والله منيحة ليكني بالدوام
هبة: لك شو يا ضرسانه طلعتي مانك قليلة بنوب… كلو شغل من تحت لتحت
مرح تركت الاوراق من ايدها و استغرب: شو قصدك ما فهمت
هبة: لك مطيرتيلو عقلو للشب صرعني وهو بدو يحكي معك كل البنات بدوخو وراه و انتي بس شافك طار عئلو فيكي… يخرب بيتك شو قوية
مرح: لك عن مين بتحكي مين الي طيرتلو عقلو!!
هبة: ههههه حاجه ولو ما عم تشوفيه كل النهار صافف سيارتو تحت شركتك ليشوفك و انتي فايته و انتي طالعه؟
مرح: صافف سيارتو!! … لحظة رح اتطلع من الشباك شوف ازا في حدا تحت شو نوع سيارتو و لونها؟
هبة: لونها اسود و نوعها مارسيدس… تتهني
قامت من مكتباه و وقفت عالشباك…فتحت طرف الستارة و اتطلعت على مواقف المراجعين و صارت تدور ع سيارة سودا نوعا مارسيدس وهي عم تدور بعيونا سمعت صوت حدا وراها
ملهم: عفواً انسة مرح؟؟ … يا انسه… انسه مرح
مرح: اه!! عفواً عفواً…
رجعت ع مكتبها و قالتلو تفضل بشو بخدمك؟
ملهم: لا بس انا اليوم صفيت السيارة بمصف الموظفين لان صرت موظف عندكن…بس حبيت قلك.. 😉
و غمزلها و ابتسم و راح… ضلت مرح مصدومة و مو فهمانه شي و الموبايل بايدها!!
رفعت الموبايل و حطتها على ادنيها: هبة!!
هبة: هههههه شبو صوتك فورا دبتي؟ والله حئك لك امك داعيتلك بليلة القدرررر ملهم حبك الك نياااالك
مرح: انتي شو عم تخبصي لك انا ست مجوزه بدك تعمليلي فضيحة بالشغل!!!
هبة: اولا هو بيعرف انك متجوزة بس حابك كتير و على حسب حكيو مافي وحده عبتلو راسو غيرك، تانيا الو شهرين بترجاني وصلو الك وما رضيت ابداً لان بعرف ردة فعلك بس هو سال عنك ووصلك… وانت حبيت خبرك مشان ما تضلك على عماكي و تعرفي تتصرفي
مرح: لك شو اتصرف انا ميته رعبه يعني ماعم افهم شي شو بدو مني ازا بيعرف انو متزوجه… رح تجننوني لك انا سمعتي متل المسك بالشغل شو هالمصيبه!!
هبة: خلص اهدي اهدي و لا تخافي، الشب كتير محترم و اكابر مو هدفو يعملك مشاكل… يوووه خلص ما بزبط حكي التلفون بعد الدوام امرقي لعندي عالبيت
مرح: ياربي دخيلك طيب رح امرق لعند اهلي بالاول و بعدا بجي لعندك يلا روحي الله يسترها معي..
كانت عم تشتغل و ايديها عم يرجفو و عيونها عم تروح وتجي لتتاكد انو مانو حواليها… شو الي عم يصير! من وين وقعت هالمصيبه فوق راسها… ما كانت تعرف…
خلص الدوام ضبت اغراضها بسرعه لتطلع بدون ما تشوفو او يشوفا… اخدت تكسي و راحت ع بيت اهلها… كان صعب تخبي توترها وخوفها… لهيك قررت تروح لعند هبة لان ما عاد متحمله…
مرح: يلا انا لازم روح
ام مرح: حبيبتي وين رايحة نامي هون اليوم
مرح: لا لازم روح شوف هبة!
ميس: لك اختي انتي بعدك بتحكي معا لهل شرشوحة؟! مو هي الي خانت جوزها و طلقها؟
مرح: ايه هي بس ضروري شوفا خلص بعدين بحكيلك… يلا بشوفكن سلام…
طول الطريق كانت عم تفكر… كيف شافها ملهم ومن وين بيعرفا وشو عجبو فيها!! لازم تفهم كل شي…
وصلت و رنت باب البيت
هبة: اهلا اهلا بالقمر تعي فوتي تئبريني
مرح: عندك حدا جوا؟
هبة: لا بس ابني حمودة.. فوتي يلا
فاتو و قعدو و مرح تطلع بهبة بطريقه غريبه و ناطرة منها تبرر كل شي عم يصير… تلبكت هبة و قامت ع المطبخ و قالتلها خليني اعمل قهوة و بعدين بفهمك كل شي!!
#مال_الشام
#المصيدة
-2-
فاتو و قعدو و مرح تطلع بهبة بطريقه غريبه و ناطرة منها تبرر كل شي عم يصير… تلبكت هبة و قامت ع المطبخ و قالتلها خليني اعمل قهوة و بعدين بفهمك كل شي!!…
مسكتها مرح و قالتلها: هبة… هلا بدك تفهميني كل شي مابدي اتسمم قهوة
هبة: يوووه لك شبك معصبة هيك، ع اساس مانك مبسوطة انو ملهم مهتم فيكي… شفتيلي هالشبوبية و هالاناقه؟ لك تضرسي كيف علقتيه
مرح: هبة هبة انتي عرفانه حالك شو بتخبصي والله ما يدرى احمد بهل حكي هاد ليدبحو… و بعدين شو قصدو بهل حركة اجا وتوظف عندي؟ لك انا بمشي الحيط الحيط وبقول يارب السترة شو اعمل بحالي شو اعمل بحاااالي
هبة: خلصتي نواح؟ متل المطلقات عم تنوحي و تلطمي!!
مرح: ايه مو انا رح صير مطلقه عنجد ازا ما بتخليه يحل عني
هبة: لك يا بنتي هو تعرضلك شي؟
مرح: لا
هبة: ازاكي شي؟
مرح: لا
هبة: لكن ليش هيك عامليتلي هالقصه؟ انا قلتلك مشان يكون عندك علم و هلا طالعيني من هالموضوع..
وقفت مرح و حملت شنتتها
مرح: ماشي يا هبة، اصلا انا رح قول لاحمد ومو خايفه من شي
هبة: هههههههههههه اااخ البي ههههههههههه
ايه حبيبتي يلا روحي اركضي قولي لاحمد تبعك مشان يدخل الشك لئلبو ويصير يقول ليش طلع هالمعجب لما انا سافرت!
هههههههههه هبلة انتي هبلة…. فظيعه هالبنت
مرح: يا الله…. طيب خلص يمكن انا عنجد مكبرتا… لشوف شو القصه… انا لازم روح … يلا باي
هبة: ابئي طمنيني عنك… الله معك
طلعت مرح و قررت تتمشى لبيتها لانو ما بدها تصرف كتير عالتكاسي… و ضلت تفكر انو هي ليش خايفه… ليش البها نائزها هيك
مرح بنت حلوة كتيررر
شعرها بلون خيوط الشمس… طويل بيوصل لخصرها… وعيونا لونن اخضر متل العشب… و مو اول مره حدا بيعجب فيها بس هالمره في شي مخوفها كتيررر…
رن موبايلها و كان المتصل جوزها احمد..
مرح: الو كيييفك
احمد: تمام منشكر الله… كيفك انتي
مرح: مشتائتلك خيرات الله ما عم بعرف عيش بلاك و محتاجتلك كتير عنجد رح اختنئ
احمد: اوووف بكفي تتصرفي متل الصغار كأني قاعد هون عم بلعب…
مرح: لا مو هيك اصدي… طيب مو مهم خليني قلك اليوم شو صار معي بالشغل… اجا المدير و اعطاني مشروع
احمد: مرح مرح… انا من وش الصبح عم اشتغل هلكاااااان بتقليلي بعدين. تصبحي ع خير…
مرح: تصبح على خير…
سكرت الهاتف و صارت تقول عادي تعودت… وصلت عالبيت تعشت لحالها.. و فاتت ع غرفتها طفت الضو و بدها تنام.. رن موبايلها

مرح: ههههه معقول هاد احمد اشتئلي؟
مسكت الموبايل و ردت فوراً..
مرح: حبيييبي؟
ملهم: عفواً؟
مرح: مين!!
ملهم: انسة مرح؟
مرح: لا، مدام مرح… انت مين؟
ملهم: ممممم انا ملهم…
بس سمعت اسمو رجفت ايدها و ارتعبت… وما عاد عرفت شو ترد لهيك سكرت الخط بوشو… بس رجع رن مرتين تلاته و عالرابعه ردت
مرح: لك شو بدك شو قلة هالزوء!!
ملهم: بعتزر منك ليش معصبه هيك طيب؟!
مرح: لا بالله؟ شو انت ما عنئك اخوتت بنات… ما بتخاف على عرضك؟ … انا ست متزوجه و ازا زوجي بيعرف بحركاتك البايخه رح بقلب الدنيا فوق راسك!!
ملهم: ليش الي بترك مرا متلك و بسافر بكون بفهم او بنخاف منو؟
مرح: بالفعل انك واحد وسخ…
ملهم: لك ليش عم تحكي معي هيك… انا معجب فيكي و بس ومابدي اعملك مشاكل و لا انزع حياتك انتي ليش هيك عم تتصرفي!!
و بهاد الوقت اتصل احمد عليها و لقى الخط مشغووول و ضل عم يتصل و مرح و ملهم عم يحكو…لوقت ما سكرو لقت عالموبايل 12 مكالمة من احمد و 7 رسائل!!! اتصلت عليه فوراً
مرح: احمد في شي؟
احمد: مع مين كنتي تحكي بهاد الوقت بالليل؟
مرح: انا؟ … كنت احكي مع
احمد: اوعي تكزبي يا مرح… اتصلت ع اهلك و اتصلت ع رفيقتك هدى… مع مين كنتي تحكي؟
#مال_الشام
#المصيدة
-3-
مرح: ليش هيك عم تحكي معي!! … يعني مع مين بدي كون عم احكي!! … هي هبة كنت احكي معا
احمد: لك مو هي الي كنتي تقليلي انو بتخون زوجا!!
مرح: يييي علينا خانتو و طلقها و تابت حاجتكن بئى معتبرينها من حثالة المجتمع!!
احمد: ايوه… هيك صار الحكي
طيب… نامي هلا.. سلام
سكرت الخط و صارت تقول جد الحمد لله ما جبتلو سيرة… اوووف من وين طلعلي هاد الغبي!! …
ياربي تستر علي…
وضلت طول الليل تفكر بحكي ملهم… كان حكيو مهذب و رومنسي كتيرررر… هيك لوقت ما نامت…
تاني نهار طلعت ع دوامها و بس وصلت لقت ع مكتبها ورد احمر و ورقة ( صباح الخير يا احلى صبيه شافتها عيوني m)
هدى: شو ياه هاد احمد بيك موصيلك عليه؟
مرح: اه؟ ايه ايه… هو…
قعدت مرح وضلت سرحانه و بالها مشغول و عم تفكرلوقت ما مرقو اربع ساعات وهي ما كانت حاسه بحدا حواليها لوقت ما سمعت حدا عم يصرخ و رمى ملفات قدامها… ارتعبت و اتطلعت عليه و كان المدير!!
المدير: شو مدام مرح… هلا بدك تدفعيلي 100 الف دولار تعويض عن الصفقه الي طارت من بين ايدي بسببك؟
انا مو طلبت الملفات يجهزو الصبح!!
مرح: انا.. انا… انا مو
انا
المدير: انتي وحده مستهترة و ماعندك مسؤولية و لا احترام للاشخاص الي وثقو فيكي و سلموكي هيك شغل
التمو الموظفين ع اصواتهن و اجا ملهم و شاف مرح عم تبكي وماعم تعرف تموقعين … قرب منهن و حكى
ملهم: ازا بتسمحلي ممكن شوف الملفات؟
المدير: خلص شو بدك تشوووف هدول بدهن شغل اربع ساعات على الاقل و الاجتماع بعد ساعه… خسرنا الصفقة
مستحيل يوثقو فينا
ملهم: طيب… انا بوعدك بعد ساعه تماماً يكونو الملفات جاهزين
الموظفين كلهن فتحو عيونهن و مرح قعدت عالكرسي وهي مصدومة لان فعلاً الملفات مستحيل يخلصو بساعه
المدير: شو انتو عم تلعبو فيني؟ كيف بدك تخلصها بساعه؟ و ايمت بدي لحق اطلع عليهن لاقدر دير الاجتماع!!
ملهم: انا رح اشتغلو انا و مرح و بالتالي نحنا رح نكون نعرف كل تفاصيل المستندات و مافي حل الا انو نحنا ندير الاجتماع
السكرتيرة: حضرت الندير الوقت مو لصالحنا.. ازا هو واثق لهل درجة خليهن يبلشو شغل و نحنا نجهز ملفات العرض و العقود
المدير: طيب يا مرح… مارح يصير خير ازا خسرت الصفقه بوعدك
ملهم: مافي داعي للتهديد…رح نعملها!
و الكل راحو و ملهم قعد جنب مرح و حط الملفات قدامهن
ملهم: افتحي ملف الشروط و اقرأيلي ياهن و انا رح اكتب الملاحظات بسرعه…
مرح ضلت تطلع فيه وما حكت و لا حرف…
ملهم: لك خلصيني ما معنا وقت
مرح: طيب طيب… يلا..
وبلشو يشتغلو و يخلصو بالملفات باسرع شكل ممكن
ملهم: مرح افتحي عالكومبيوتر افتحيلي ملف اسعار الاسمنت للشراكات المنافسة لشركتنا
مرح: يلا.. لحظة
ملهم: لك شو صار معك
مرح: ما عم لاقيهن وينن بانو ملف!!
قام ملهم من مكانو ووقف ورا كرسي مرح… حط ايدو على ايد مرح و قرب وشو من شعرها و كان يتطلع بالكومبيوتر و يدور عالملف و مرح مصدومة
مرح: ملهم بعد عني!!
ملهم: عفواً ما انتبهت … لقيتو.. اطبعيه فوراً… و جيبي الملفات و الحقيني ع قاعة الاجتماعات
مشي ملهم مستعجل مسكتو مرح و قالتلو انا خايفه هاد الي عم نعملو جنان…
ملهم: ههههه يا سنفورة انا متاكد بس يشوفو عيونك رح يشترو بدون ما يشوفو العقود… يلا الحقيني…
فاتو و كان المدير و السكرتيرة و بعض الموظفين قاعدين ووشهن ما عم يتفسر..
المدير: مستحيل كيف خلصتو؟
ملهم: مرح زكيه كتير و قدرت تنجزهن… وهلا رح تقنعهن بالصفقه انا واثق
المدير: مرح لصالحك انو ما يطلعو من عنا الا وهن موقعين
وصلو ضيوفهن و بلشو الاجتماع و مرح و ملهم ورجوهن عروضهن و الملفات و تناقشو كتيرررررر و بصعوووبة قدرو يقنعوهن بالعرض… و باخر لحظة قررو يوقعو..
وقعو و اتفقو و طلعو من الشركة
المدير: انا ما عم سدئ… مستحيل! ملهم انت فظيع…
ملهم: لا لا… صاحبة الانجاز هي الانسه مرح لولاها ما كنت بقدر اعمل شي
المدير: بكرا امرقو لعندي عالمكتب ضروري…
ضب ملهم اوراقو و طلع… وهو ماشي سمع مرح عم تندهلو
مرح: ملهم استنا!!
#مال_الشام
#المصيدة
-4-
ملهم: ايه مرح تفضلي؟
مشيت لعندو ووقفت قدامو و رقعت عيونها فيه: شكراً.. بس هاد ما بيعني انو شي رح يتغير انا بحب جوزي كتير وعندي ياه بالدنيا
ملهم: هلا هيك العالم بتتشكر!!
مرح: لكن كيف العالم بتتشكر؟!
ملهم: بعزمو بعضهن ع فنجان قهوة و بيتفاهو
مرح: اه بالله؟
ملهم: ليكي يا بنت الناس، بما انك قلتي انو بتحبي جوزك خلص
انا رح اعتبرك مجرد صديقه لا اكتر و لا اقل… بالنهاية نحنا زملاء بالشغل صح؟
مرح: عنجد عم تحكي؟
ملهم: اي والله
مرح: ازا هيك معناتا احلى فنجان قهوة… يلا امشي
طلعو بسيارة ملهم و نزلو بكفتيريا صغيرة هاديه كتير و حلوة..
مرح: مممم ولا مره جيت لهون باين المكان كتير حلو
ملهم: هاد المكان غالي كتير ع البي…انا و خطيبتي كنا نجي لهون
مرح: ياااعيني و كمان عندك خطيبه… جدبه خطيبتك لازم تضبك لان عيونك زايغه ههههه
ملهم ابتسم ابتسامه و قلها: مافيها تضبني
مرح: يوه ليش؟
ملهم: لانها مو بالدنيا… خطيبتي ماتت الله برحما
تغير لون وش مرح و اتدايئت كتير: انا اسفه والله مو اصدي
ملهم: لا عادي… ماتت بالسرطان.. اخدها مني
خبت علي مرضها مشان ما ازعل و قاطعتني وقت طويل
ما سمحتلي وقف جنبا..
وهي عم تموت اتصلو علي اهلها و قالولي تعا ودع خطيبتك..
بتعرفي؟ طلعت ركض و ما كنت مسدئ
ركضت بالشوارع و انا عم ابكي و العالم تتفرج علي..
وقت وصلت الكل كان عم يبكي…
فتت عليها كانت دبلانه…و لا كانها هي… ضميتها لصدري و قلتلها لا تتركيني… بس تركتني… مرح عم تبكي؟
مرح: لا لا… هي غبره فاتت بعيني
ملهم: طيب امسحي دموعك! خلص القصه راحت من زمان و ليكني عايش… خليني روح اطلب قهوة
مرح: ماشي
قام ملهم و صارت مرح تمسح دموعا… و رن موبايلها كان جوزها
مرح: الو احمد
احمد: كيفك حبييي كيف شغلك
مرح: تمام..
احمد: تمام؟ ليش معصبه طيب!؟
مرح: والله جد؟ انت وقت تكون رايق بدك اضحكلك و اتغزل فيك ووقت كون محتاجتلك ما بتهتم فيني!!
احمد: حبيبي مو هيك انا عم اهلك بالشغل ما بيرحموني ابداً
حقك ع راسي من فوقوبس انا لمين عم بتعب؟ مو كرمالك ياحبي؟
مرح شافت ملهم جاي من بعيد
مرح: ايه حاجه كزب هاد الحكي ما عاد يمشي معي باي
ملهم: مع مين عم تحكي؟
مرح: لا هي بس امي كانت تطمن علي… شو رح تتغدا اليوم؟
ملهم: بتعرفي؟ اليوم جايه عبالي اكل بحري… سمك مشوي و مقلي وهيك قصص… في محل عالبحر بدي روح عليه
مرح: مممم و انا مشتهية اكل بحري
اتطلع ملهم بعيون مرح و هي اتطلعت فيه و ضحكت وهو ضحك
ملهم: هههههه طيب منروح سوا لكن؟
مرح: ايه منروح
ملهم: و بعدا منطلع بالبيخت لورجيكي الاحساس بنص البحر؟
مرح: لا لا صعب
ملهم: مرررح ما بدها دلال القصه… هاد العرض ما رح يصحلك اكتر من مره… شو قلتي؟
مرح: طيب بفكرررر
ملهم: حلو… يلا خلينا نطلع لان الطريق بدو وقت
مرح: ممكن نمرق عالبيت بدل تياب الشغل،؟ بدي البس شي شغل بحر
ملهم: ايه يلا… تكرمي.
#مال_الشام
#المصيدة
-5-
وصلت عالبيت لبست فستان ابيض و فردت شعرها و حطت بارفان و كان بدها تطلع رن موبايلها و كان احمد!!
احتارت شو تعمل بعدين بعتتلو رسالة انا مريضه كتير و اخدت دوا بسبب النعس … تصبح على خير
و طفت موبابلها و تركتو بالبيت و طلعت
ملهم: تاخرتي
مرح: بعتزر يلا خلينا نمشي…
مضو الطريق و هن يحكو و يضحكو لوقت ما وصلو
كان مطعم كتير حلو بيطل ع البحر… تغدو و قعدو على الشط يتفرجو ع الغروب
ملهم: مرح هلا انتي عنجد بتحبي جوزك؟
مرح: ايه والله بحبو كتير و مافيني عيش بلاه
ملهم: اوف… طيب ما بتخافي يعرف انك معي؟
اتطلعت عليه مرح و هي معصبه
ملهم: مو قصدي شي
مرح: انا اعتبرتك صديق مو اكتر و انا مو نيتي خونو بعدين انا تعاطفت معك كتير و وجعني البي عليك… بكل الاحوال خليني ارجع ع بيتي
قامت نكتت تيابها و بدها تمشي مسكها ملهم من ايدها وشدها لعندو… و قعدها جنبو
ملهم: هلا انا مو عاجبك؟
مرح: ملهم شو هالحكي مو اتفقنا اننا رفقات؟
مسك وشها و تطلع بعيونها: انتي مو معجبه فيني؟
مرح: ايه بس انا متجوزة
ملهم: عادي بتطلقي
مرح: شوووو… انت مجنون؟ خلص رجعني عالبيت
ملهم: طيب طيب اهدي… انا صرت حاجز اليخت ليكو هداك الابيض الي هنيك شوفيه
مرح: ياااااااخ هلا هاد بدنا نطلع فيه؟
ملهم: ههههههه ايه يلا مشي
طلعو باليخت و انبسطو كتيرررر كتير كتير و نزلو بوقت متاخر… وصلها على بيتها و وقفو السيارة قدام البيت
مرح: انت ليش جيت هلا؟
ملهم: ما بعرف… يمكن جيت متاخر بس المهم انو جيت
و انتي الخيار بايدك… عنجد فكري بالطلاق
مرح: خلص انا نعسانه… بشوفك بكرا بالدوام باي
ملهم: رح اشتقلك… باي
نزلت مرح من السيارة وهي طايرة من الفرحة و ودعها ملهم لفااتت عالبيت… رن موبايلو..
ملهم: اهلااااا بست الستات
هبة: وينك من وش الصبح عم دئلك؟؟؟
ملهم: ههاااااي… هاتي البشارة… السنارة غمزت
هبة: شو يعني؟
ملهم: يعني ملهم وفى بوعدو و ربحت الرهان.
#مال_الشام
#المصيدة
-6-
هبة: ييييي احلف؟ لك كيييييف انا ما توقعت تزبط معك
ملهم: له… عيب يا مدام… هلا هي راسها يابس شوي بس انا عرفت اشتغل صح… اول شي لعبت ع مشاعرها و عملتلها فيلم هندي انو انا كنت حب وحده وماتت و صارت تبكي الجدبه تركتا وقمت فرطت ضحك… و بعدين طيرتلها عئلها بالمشاوير و الحكي الحلو… وبيني وبينك جوزها ساعدنا كتير شكلو حيط و بيهملها لهيك لجئت الي و طلعت معي
هبة: ان شاء الله بالهفى هي و جوزها الله لا يوفقهن فضحوني
ملهم: لك انا بدي اسالك صحيح… انتي كيف عرفتي انو جوزها هو الي خبر جوزك انك بتخونيه؟
هبة: بلا هالسيرة بينسم بدني
ملهم: لا بالله بدي اعرف عندي فضول
هبة: لك بنت حماها دلال ما بتطيئها بتكرها كتير لمرح و انا وياها صحبة… ف مره قالتلي ( اصلا مرح ما فيها خير لحدا حتى الك ما فيها خير لان فضحتك قدام اخي و قالتلو انك بتخوني جوزك و اخي اجا و حكى قدامنا)
وجوزي و جوزها كانو رفقات كتير… هي حكت للمغضوب و هو حكى لجوزي… وهلا انا عم اشتغل هالشغل الوسخ لطلع مصاري مشان ما يقدر ياخد ابني مني
ملهم: وجعني راسي… مع اني ما بحس بنوب بس زعلان عليكي انتي و مرح… يلا ما علينا… بدي مصاري
هبة: الله لا يشبعك صرت دافعتلك دم البي مشاويرك و لبسك و طلعاتكن كلها ع ضهزي
ملهم: هاد الحكي ما بقطع معي… بدي مصاري
هبة: طيب تعا هلا خود… والله بتستاهل ليش الكزب
ملهم: يلا جاي بسرعة البرق…
______________________________
بهاد الوقت مرح فاتت اخدت دش و لبست بجامتها و فاتت لتنام… خطرلها تفتح الموبايل… شغلتو
وهون كانت الصدمة
100 رسالة من احمد!!!
(حبيبتي انتي منيحة؟ )
(مرح انا رح اترك كل شي و انزل لعندك)
(امانه اول ما تصحي طمنيني)
مرح: لك انا شو عملت بحالي!!! …. لك شو صرلي
لك انا شوووو عملت شووو عملت يا الله كيف عملت هييييك
و صارت تبكي و تصرخ
مرح: انا بدي احمد.. مابدي غيرو كيف عملت فيه هيك لك وين عقلي انا حقيرة… حقيررررة
ضلت تبكي لوش الصبح… نامت من التعب و ما راحت على الدوام..
ضل ملهم يرنلها و ما كانت ترد عليه ابداً و لا ترد على احمد..
بعد تلات ايام صحيت ع حالها و قررت تترك الشغل… رنت ع احمد
مرح: حبيبي
احمد: حبيبك!!! حبيبك يا مرح؟؟ لك انا جنيت… ما عرفت اطمن عليكي
خفت خبر اهلك يقلقو و خفت خبر اهلي و يزعجوكي بشييي
مرح: احمد احمد… انا كنت كتير مرضانه و صوتي رايح وما حدا طل علي.. و اليوم لقدرت احكي
احمد: جد!! انا اسف… خلص ما عاد يمشي الحال ضل بعيد عنك… المبلغ الي جمعتو بمشي الحال… او بجي اخدك بس هيك مو حاله
مرح: اوعى تجي انا استقلت من الشغل ما صفي فينا ندفع الاجار!
احمد: استقلتي ليش؟
مرح: خلص حبيبي لنحكي بالليل بقلك..
احمد: طيب اصلا ما فيني اتاخر… بس بدي قلك تروحي ع بيت اهلي تباركيلهن لانو دلال انخطبت
مرح: امانه بتحكي جد والله فرحتني من كل البي…
سكرت الخط معو و اتصلت ع ملهم فوراً و قالتلو انو ينسى كل شي صار وهي متجوزة وما بتقدر يكون عندا اصدقاء شباب و ضل يحاول يترجاها بس ما مشي الحال…
هي سكرت و ارتاح قلبها
و ملهم كان رح يجن ومو راضي يعترف بهزيمتو…
مرق شهر وملهم يحاول يوصل لمرح بس هي استقالت و غيرت رقمها…
راح ملهم لعند هبة و فتحتلو الباب
هبة: شو بدك خير؟
ملهم: بدي مصاري
هبة: مافي بطيخ… ما طلع معك شي ع شو بدي اعطيك مصاري؟
ملهم: هيك صار الحكي؟
هبة: هيك و نص و روح بلط البحر
ملهم: انا ما بطلع بدون مكسب و ازا ما في مصاري ف بدي كم ساعه حلوة مع الحلو
هبة: بعد عني يا حيوان… ازا بدك شي روح خدو من حبيبة القلب مرح
ملهم: ليش انا عرفان اوصللها؟
هبة: شغل مخك.. بيمشي الحال
ملهم: بس هي ما بتنوجد ببيتها
هبة: السبت بتنام ببيتها عالاكيد… ليكني سلمتك راس الخيط
خدها جائزة ترضيه بما انو مافي مصاري… يلا اطلع من هون
ملهم: ايه… كم يوم و بيجي السبت… بسيطة يا مرح خانوم
بتستاهلي التعب…
#مال_الشام
#المصيدة
-7-
طلع ملهم وهو ناوي على نية وسخة لمرح… و هبة حست انو هيك بوصلها حقها من هبة الي فسدت عنا و خربتلها حياتها بعد ما كانت تعتبرها رفيقتها و اغلى من روحها،،
كانت هبة عم تلاعب ابنها لما رن موبايلها…
شافت اسم مرح و قررت ما ترد
هبة: اليوم الجمعه، ما رح رد عليكي
بكرا بعد ما تنكسر عينك و تذوقي الذل الي انا بذوقو كل يوم…وقتا رح احكي معك يا مرح خانوم… بسيطة
ضلت مرح تدئلها و ما كانت ترد عليها بنوب…
تاني نهار صبح يوم السبت لقت هبة رسالة من مرح: هبوشة في شي مهم مابدي تسمعيه من حدا غيري… لازم تردي علي..
هبة: ليكون بدك تعترفي انك طعنتيني بضهري؟ و انا سامحك و هيك خلص؟ لا لا… فشرتتتتتي…
رمت موبايلها بالارض و قامت تعمل قهوة… بس رجعت لقت الموبايل بايد ابنها الصغير
هبة: لك حمودة شو بدك بالموبايل هات حبيبي.. يييييي لك هاد فاتح خط ع مرح… شو يدي اعمل
مرح: الوووو هبة سامعتيني؟ الووو؟
هبة: هلا مروحة حبيبتي اهلين
مرح: هبة بدي قلك شغله
هبة: بعدين بعدين مو فاضيه هلا يلا باي
مرح: دلال بكرا عرسها
هبة: شو؟ كيف يعني عرسها؟ مستحيل بلا مزح
مرح: توقعت انك مابتعرفي… بس مو هاد الشي المهم
هبة: انا مو فاهمة شي شو القصه؟
مرح: العريس بكون جلال… جوزك…
انصعقت هبة و ما عاد طلع صوتا و ابنا صار يبكي
مرح: الو هبة… حبيبتي هبة لا تزعلي والله ما بيستاهل ظفرك
هبة؟ هبة انا والله بس حبيت قلك مشان ما تسمعي من الغريب… ياربي هبة… الوو
سكرت هبة الخط و كانت مصدومة بالي سمعتو!
دلال رح تتجوز دلال؟! طيب كيف و ايمت لحقو؟
دلال الي فهمتني انو مرح هي الي فضحتني هلا عم تتجوز جوزي؟
مسكت موبايلها و اتصلت على دلال و ما ردت عليها… اتصلت على ارضي البيت و للصدفه ردت دلال
دلال: الو مين معي؟
هبة: انا هبة… ليش ما عم تردي ع موبايلك؟
دلال: هبة!!!!! انا… نحنا… يعني
والله نحنا مشغولين لان احمد بعد شوي رح يوصل و عاملها مفاجئة لمرح… بحكي بعدين باي
هبة: الوووو…. الوووو
دلاللل يا حقيررررة يا كزااااابة
احمد جاي؟!!! … اليوم السبت!!!!
لك مرررررح…. انا شوووو عممملت شو عملت
ازا وصل احمد مع فوتت ملهم رح يدبحهن التنين… لك رح يدبحهن!!! صارت تتصل على ملهم و مو كان يرد لانو ترك موبايلو بالسيارة و نزل لفوت ع بيت مرح
و مرح كانت عم تاخد دش و سامعه موبايلها برن بس كانت بالحمام…
ضل ملهم يحاول يفتح الباب ما مشي الحال… لف حوالين البيت و لقى انو شباك لبمطبخ ما الو حمايه!!
فتحو و فات منو…
و فات ع غرفة النوم ووقف ورا الباب…
مرح كانت عم تفكر بهبة و اديش صعب شعورها انو تعرف بزواج دلال و جلال لان علاقتها بدلال كانت ممتازة اخر فترة..
لبست تيابها… و طلعت من الحمام و هي عم تنشف شعرها
#مال_الشام
#المصيدة
-8-
هبة ركضت عالموبايل و رنت رقم الشرطة: الو مرحبا بدي بلغ عن سرقة بيت
في حرامي انا شفتو فايت ع هاد البيت ومافيه الا ست وحيده
مشان الله تلحقوها…. مشان الله
اي سجلي العنوان… شارع الورد… خلف مبنى التميز
بيت رقم 24…
و ركضت لبست تيابها و اخدت ابنها و طلعت مستعجلة متل المجنونة…
فاتت مرح على غرفتها و شغلت الضو… سكرت الباب و ما شافت قدامها الا ملهم واقف ورا الباب!!
مرح: لك انت شو عم تعمل هووووووون…
ركضت لتفتح الباب و تطلع مسكها و حط ايدو ع تمها
ملهم: لا تعملي فيها شريفه و ما الك بالحرام… لولا شوي كنتي رح تطلقي جوزك لتجي لعندي بس ما بعرف شو صارلك
و مرح تحاول تفلت من ايدو و تصرخ و تحاول تضربو بس ما قدرتلو..
ملهم: اي خلص بئى… المحترمة ما بتطلع مع واحد بعرض البحر لحالها و بتفوت و بتطلع و هي على ذمة رجال… مافي شي ببلاش مرح خانوم
عضت مرح ايدووو و قدرت تفلت… فتحت باب الغرفة و طلعت ع الغرفة التاتيه و قفلت الباب…
صارت تصرخ بس محدا سمعا و ملهم يضرب الباب و رح ينكسر
ما لقت حل قدامها الا مزهرية فخار… مسكتها و تخبت ورا الباب
كسر ملهم الباب و فات و فورا ضربتو ع راسو وقع عالارض و نزل دم من راسو و بعدا سمعت صوت سيارات الشرطة و صارو يدقو عالباب
ركضت من رعبتا فتحتلهن و وقعت عالارض و هي منهارة..
لوقت ما فاتو حملو ملهم و اخدو مرح بالسيارة معهن وصل احمد..
احمد: شو في… شو عم يصير هووون!!
الشرطة: مين انت؟
احمد: لك انا صاحب البيت وين مرتي شو صاير؟
الشرطة: في حرامي دخل بيتكن و المدام ضربتو ع راسو
تفضل انت كمان معنا
احمد: مرح ويناااا؟؟؟
الشرطة: بالسيارة هنيك..
ركض احمد و فتح باب السيارة و الشرطة تركوه يحكي معا
احمد: مرح… مرح ردي علي صرلك شي؟ لك ليش ما عم تحكي
الشرطة :بتحكو بالمركز بتفضلو…
ملهم اخدوه عالمستشفى و فاق من الوعي بعد ساعتين و راح احمد شافو و اخدو افادتو و مرح ما قدرو يفهمو منا شي… بعد 3 ساعات اجا احمد قلها قومي اطلعي المحضر تسكر و كل شي وضح!
بكت مرح و عرفت انو ملهم حكى كل شي…
مشت مع احمد و وقفت بالشارع
مرح: احمد… انا اسفه
احمد: على شو؟
مرح: لاني خ..
هبة: مررررررررح… مررررح… الحمدلله عالسلامة
اجت هبة تركض من بعيد و ابنها ع صدرها و ضمتها لمرح
هبة: الحمدلله هالحرامي الحقير اعترف انو فات ليسرق و انتي شفتيه و ضربتيه الحمدلله الحمدلله…
و مرح كانت مصدومة انو ملهم كتير حقير ليش ليتستر علي!
قربت منها هبة و همست بادنها: كلنا منغلط… المهم نتعلم من غلطنا… لا تعملي متلي و تخسري حياتك… انا ما كان عندي خيار بس انتي فيكي تصلحي غلطك…
و رجعت لورا و صارت تحاكي احمد و تشغلو بالحكي و مرح كانت عم تبكي و تفكر بحكيها لهبة
و فجأة ركضت لحضن احمد و قالتلو انا اشتقتلك كتير لا عاد تتركني…
ابتسمت هبة… و شدت ابنها و بعدت عنهن…
هبة: يا امي امك رح تتغير… رح خليك ترفع راسك فيني يا حبيبي…
علاقة مرح و احمد رجعت متل اول و احسن و احمد ما عرف شي ابداً
و هبة دفعت لملهم مصاري و هددتو مشان يقول انو كان فايت يسرق و مشان يبعد عن مرح…
بعد 3 شهور مرح حبلت و فرحت كتير هي و احمد و عطول كانت تدعي لالله يغفرلها و تحجبت عن قناعه و رضى…
هبة راحت و حجت و تابت و غيرت بيتها و حياتها كلها… و جلال صار يحاول يرجعها لذمتو لان ما قدر ينساها و لانو تاكد انها تغيرت..
و دلال طلعت عقيم و ما بتجيب اولاد…
و كل انسان حصد نواياه و افعالو…
#تمت

admin

اترك تعليقاً

لن يتم نشر عنوان بريدك الإلكتروني.

error: Content is protected !!